Azərbaycanda “Siyasi partiyalar haqqında” Qanunun uğurlu realizəsi ali niyyətlərə sadiqliyi göstərir ŞƏRH
Bakı, 17 may, AZƏRTAC
“Siyasi partiyalar haqqında” yeni Qanunun qəbul edilməsi və uğurla realizəsi ilə Azərbaycan dövləti nümayiş etdirdi ki, Konstitusiyanın preambulasında ifadə olunmuş, “Konstitusiya çərçivəsində demokratik quruluşa təminat vermək, vətəndaş cəmiyyətinin bərqərar edilməsinə nail olmaq” kimi ali niyyətlərə sadiqdir.
Bunu AZƏRTAC-a açıqlamasında Milli Məclisin deputatı Bəhruz Məhərrəmov deyib.
O xatırladıb ki, Prezident İlham Əliyev hələ 2020-ci ilin mart ayında, VI çağırış Milli Məclisin ilk iclasında qeyd olunan ali niyyətə sədaqətini ifadə edərək siyasi islahatların zərurətini ifadə etmiş, Azərbaycanda çoxpartiyalı sistemin daha da möhkəm əsaslar üzərində qurulması məqsədilə qanunvericilik sahəsində təkmilləşdirilmənin vacibliyini dilə gətirmişdi. Deputatın sözlərinə görə, Azərbaycan Prezidentinin təşəbbüsü və tövsiyəsi ilə digər partiyaların nümayəndələrinin növbədənkənar seçkilərdən sonra yeni formalaşan Milli Məclisin sədarətində və komitələrin rəhbərliyində təmsil olunması dövlətin bu islahatlarda nə qədər maraqlı olduğunu əməli formada göstərdi.
“Proseslərin davamı olaraq istər beynəlxalq, istərsə də regional mexanizmlərin çərçivəsində, 1948-ci il İnsan hüquqları Bəyannaməsi, 1950-ci il Avropa Konvensiyası, 1966-cı il Mülki və Siyasi hüquqlar haqqında Pakt kimi konseptual sənədlərdə fərdlərin hüquq və azadlıqlarına yönəli imperativ prinsipləri özündə ehtiva edə bilən “Siyasi partiyalar haqqında” Qanunun qəbulu və cəmi 8 ay sonra mövcud siyasi partiyaların yeni qanunvericiliyin tələblərinə müvafiq olaraq qeydiyyat prosedurlarının tamamlanması əslində siyasi islahatların mühüm mərhələsinin uğurla yekunlaşdığını göstərir. Bu gün artıq əminliklə demək olar ki, Azərbaycanın yeni siyasi konfiqurasiyası formalaşmış və çoxpartiyalı siyasi sistemin təkmilləşdirilməsi istiqamətinə istər praktik, istərsə də qanunvericilik sahəsində mühüm mərhələ adlanmışdır. Lakin, eyni zamanda, etiraf etməliyik ki, cari situasiya tam innovativ baxış tələb edir ki, bu mərhələyə keçidin ictimai münasibətlərə mənfi təsirinə səbəb olmadan realizəsi vacib şərtə çevrilib”, - deyə B.Məhərrəmov bildirib.
O qeyd edib ki, mayın 16-da Prezident Administrasiyası tərəfindən Milli Məclis Aparatının, Mərkəzi Seçki Komissiyasının, Hesablama Palatasının, Ədliyyə və Maliyyə nazirliklərinin, habelə 25 siyasi partiyanın nümayəndələrinin iştirakı ilə təşkil olunan “Siyasi partiyalar haqqında qanunun tətbiqi məsələləri”nə dair görüş, ilk növbədə, məhz bu hədəfə doğru səmərəli addım hesab oluna bilər: “Aydındır ki, son nəticədə məqsəd çoxpartiyalı sistemin daha da inkişafıdır. Altıncı çağırış Milli Məclisin ilk iclasında tarixi çıxışı zamanı Prezident İlham Əliyev özü də bəyan etmişdi ki, "biz doğrudan da istəyirik ki, Azərbaycanda çoxpartiyalı sistem inkişaf etsin". Nəticə etibarilə 2020-ci ildən sonra məhz Prezidentin təşəbbüsü ilə ölkədə davamlı olaraq müxtəlif siyasi qüvvələr arasında konstruktiv əməkdaşlıq, sağlam siyasi dialoq və ümummilli məsələlərdə həmrəylik mühitinin təşviqi daha da güclənib. Ötən dövr ərzində atılan addımlar birmənalı formada göstərməkdədir ki, Azərbaycan iqtidarı siyasi partiyalarla dövlət orqanları arasında konstruktiv əməkdaşlığın qurulması və inkişaf etdirilməsini haqlı olaraq zəruri hesab edir. Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyevin də ölkənin siyasi sisteminin təmsilçiləri ilə görüşdə vurğuladığı kimi, bu kimi tədbirlər “siyasi partiyaların mövcud potensialının dövlət siyasətinin və ictimai münasibətlərin daha da inkişafına yönəldilməsi imkanlarının genişləndirilməsinə xidmət edir”. Azərbaycan hakimiyyəti haqlı olaraq hesab edir ki, sağlam əməkdaşlıq milli həmrəyliyi, sabitliyi və dayanıqlı inkişafı təmin edən amillərdən biridir”.
Deputat deyib ki, bu gün ölkədə mövcud olan siyasi partiyaların mütləq çoxluğu təbii siyasi fikir müxtəlifliyinə baxmayaraq məhz bu prizmada həmrəydir. İslahatların vacib mərhələsi kimi formalaşmış və Prezidentin siyasi sistemə yeni yanaşmasının ifadəsi kimi yaradılmış Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin dövlət başçısının iradəsini dəqiqliklə və korrekt formada icra etməsi, əlbəttə, bu prosesə özünün xüsusi töhfəsini verib. Lakin proseslərin gedişi göstərdi ki, dövlətin bütün pozitiv gedişlərinə rəğmən müstəqilliyin ilk illərində Qarabağ və Şərqi Zəngəzuru xəyanət və satqınlıq nəticəsində qurban vermək hesabına hakimiyyəti zəbt edənlər, hakimiyyətdə qalmaq üçün isə qardaş qanını axıtmaqdan, hətta vətəndaş müharibəsindən belə çəkinməyənlərin mahiyyəti bu gün də dəyişməyib. Azərbaycan Prezidentinin bu il mayın 10-da Şuşadan bəyan etdiyi kimi, “bu xəyanətkar tör-töküntüləri, onların böyük əksəriyyəti hətta bizim Zəfərimizdən ciddi məyusluq yaşamaqdadırlar”. Təbii ki, belə “siyasətçilərin” səhvini dərk edərək cari konfiqurasiyada yer almasını gözləmək sadəlövhlük olardı. Lakin milli məsələlərdə həmrəyliyin qorunmasına xidmət edən təşəbbüslərin, o cümlədən 25 siyasi partiyanın nümayəndələrinin iştirakı ilə baş tutmuş müvafiq görüşün, ilk növbədə, məhz Prezident Administrasiyası tərəfindən reallaşdırılması göstərir ki, dövlətimiz bu prosesdə səmimidir. Eyni zamanda, yeni konfiqurasiyada dialoq mühitinin uğurlu formatı göstərməkdədir ki, Prezident İlham Əliyevin direktivləri rəhbər tutularaq çoxpartiyalı sistemin daha da möhkəm əsaslar üzərində qurulması məqsədilə ölkədə siyasi partiyaların fəaliyyəti üçün lazım olan bütün alətlər spektri artıq formalaşdırılıb.
Bölmənin digər xəbərləri
