Azərbaycanda tikilən yeni Data Mərkəzlər süni intellekt texnologiyalarının tələblərini qarşılayacaq
Bakı, 9 sentyabr, AZƏRTAC
Bu ayın sonuna qədər “AzInTelecom”un yeni avadanlıqları öz Data Mərkəzində yerləşdirmək planı var. İnfrastrukturun tam şəkildə işlək vəziyyətə gətirilməsi ilin sonuna qədər başa çatdırılacaq və müştərilərə təqdim ediləcək.
AZƏRTAC xəbər verir ki, bu barədə “AzInTelecom” MMC-nin İdarə Heyətinin sədri Elxan Əzizov bildirib.
E.Əzizov qeyd edib ki, yeni Data Mərkəzlərin qurulması süni intellektin inkişafı baxımından mühüm əhəmiyyət kəsb edir: “Süni intellekt texnologiyalarından istifadə üçün serverlər böyük enerji tələb edir. Yeni Data Mərkəzləri bu imkanları təmin edəcək”.
Azərbaycanda son dörd il ərzində “bulud” xidmətlərindən istifadənin beş dəfə artdığını deyən qurum sədri bu artımı elektron və rəqəmsal xidmətlərə tələbatın çoxalması ilə əlaqələndirib. Elxan Əzizov qeyd edib ki, hazırda bulud texnologiyalarının tətbiqi sayəsində xidmətlərin dayanıqlığı və əlçatanlığı təmin olunur.
“İnfrastruktur avtomatik genişləndirilir və istifadəçi sayının artması xidmət keyfiyyətinə mənfi təsir göstərmir. Bu proses “auto-scaling” texnologiyası ilə idarə olunur ki, resurslar tələbə uyğun avtomatik artır və ya azalır. Azərbaycanda artıq 140-a yaxın dövlət qurumu “Hökumət buludu”na köçürülüb”, - deyə E.Əzizov əlavə edib.
Bölmənin digər xəbərləri
