AZƏRBAYCANDA UŞAQ HÜQUQLARININ MÜDAFİƏSİ SAHƏSİNDƏ ƏLDƏ EDİLMİŞ UĞURLAR YÜKSƏK QİYMƏTLƏNDİRİLİR
AZƏRTAC xəbər verir ki, iyunun 17-də xarici işlər naziri Elmar Məmmədyarov ölkəmizdə fəaliyyət müddətinin bitməsi ilə əlaqədar YUNİSEF-in Azərbaycandakı nümayəndəsi Hana Singer ilə görüşmüşdür.
Xanım H.Singer fəaliyyəti dövründə ölkəmizdə baş verən bir sıra dəyişikliklərin şahidi olduğunu qeyd edərək, uşaq hüquqlarının müdafiəsi sahəsində əldə edilmiş uğurları yüksək qiymətləndirmişdir.
YUNİSEF-in nümayəndəsi xüsusilə insan potensialının inkişafı indeksinin yüksəlməsi, uşaq ölümünün azalması, dövlət tərəfindən uşaqların sosial rifahının yaxşılaşdırılması, təhsilin və savadlılığın artırılması, uşaq hüquqlarına dair qanunvericiliyin təkmilləşdirilməsi sahəsində görülmüş işlərin ölkəmizin imicinə müsbət təsir etdiyini bildirmiş və Azərbaycanı artıq bu sahədə model ölkə kimi qiymətləndirmişdir.
Nazir Elmar Məmmədyarov cəmiyyətin inkişafı üçün insan kapitalının vacib amil olduğunu və bu istiqamətə hökumətin xüsusi diqqət ayırdığını bildirərək, təhsil və sosial islahatlara vacib əhəmiyyət verildiyini diqqətə çatdırmışdır.
Nazir Ermənistanın Azərbaycana hərbi təcavüzü və onun acı nəticələri haqqında danışmış, YUNİSEF-in qaçqınlar və məcburi köçkünlərlə bağlı gördüyü işləri təqdirəlayiq hesab etmişdir.
Bölmənin digər xəbərləri
