SİYASƏT
AZƏRBAYCANIN BEYNƏLXALQ HÜQUQ ƏMƏKDAŞLIĞI GENİŞLƏNİR
Prezident Heydər Əliyevin rəhbərliyi ilə həyatımızın bütün sahələrində mütərəqqi islahatların uğurla aparılmasında inkişaf etmiş dövlətlərin təcrübəsindən geniş istifadə olunmuş, nüfuzlu beynəlxalq təşkilatlarla bu sahədə işgüzar əlaqələr qurulmuşdur.
Xəbər verildiyi kimi, bu il avqustun 31-dən sentyabrın 5-dək AFR-in Bremen Federal Vilayətinin baş naziri və ədliyyə naziri, Bremen şəhərinin valisi Henninq Şerf ölkəmizdə səfərdə olmuşdur.
Azərbaycan və Almaniya arasında hüquqi sahədə səmərəli əməkdaşlıq mövcuddur. Belə ki, iki ölkənin hökumətləri arasında bağlanmış «Texniki əməkdaşlıq haqqında saziş”ə əsasən Almaniya Texniki Əməkdaşlıq Cəmiyyəti (GTZ) ölkəmizdə hüquqi islahatların aparılmasında, o cümlədən yeni mütərəqqi qanun layihələrinin hazırlanmasında fəal iştirak etmiş, bu cəmiyyət tərəfindən bir çox mühüm beynəlxalq tədbirlər təşkil olunmuşdur.
Ölkəmizin tarixində ilk dəfə olaraq hakimlərin test üsulu ilə seçilməsində müşahidəçi kimi iştirak edən GTZ prosesin şəffaf və obyektiv keçirilməsini yüksək dəyərləndirərək, yeni seçilmiş hakimlərin tədrisinə fəal qoşulmuş, Almaniyanın görkəmli dövlət xadimi və hüquqşünası Henninq Şerf hakimlərin seçilməsi prosesindən dərhal sonra - 2000-ci ilin sentyabr ayında bu nüfuzlu təşkilatın xətti ilə Azərbaycana səfər edərək hakimlər, ədliyyə işçiləri, prokurorlar və digər hüquqşünaslar üçün aktual mövzular üzrə geniş mühazirə ilə çıxış etmiş, onları beynəlxalq təcrübə ilə tanış etmişdir.
Həmçinin, Ədliyyə Nazirliyi tərəfindən GTZ ilə sıx əməkdaşlıq davam etdirilərək, təkcə bu ilin ötən ayları ərzində ölkəmizin müxtəlif bölgələrində hakimlər üçün 9 zona seminarı keçirilmiş, təşkilatın xətti ilə Azərbaycan nümayəndələri Almaniyada işgüzar səfərlərdə olmuş, faydalı təcrübə mübadiləsi aparılmış, əməkdaşlıq üzrə konkret tədbirlər barədə razılığa gəlinmişdir.
Azərbaycanın ədliyyə naziri Fikrət Məmmədovun dəvəti ilə ölkəmizə yenidən işgüzar səfərə gəlmiş H.Şerf Ədliyyə Nazirliyində görüşlər keçirmiş, ölkəmizdə müvəffəqiyyətlə həyata keçirilən hüquqi islahatlar nəticəsində qısa müddət ərzində əldə edilmiş nailiyyətləri və mütərəqqi tədbirləri dəyərləndirərək, hüquqi sahədə əməkdaşlığın əhəmiyyətini vurğulamışdır.
Sonra H.Şerf ədliyyə işi, habelə bələdiyyələrin fəaliyyəti ilə bağlı ölkəsinin təcrübəsi barədə Azərbaycan ədliyyə işçiləri qarşısında çıxış etmiş, verilən sualları ətraflı cavablandırmışdır. Həmçinin, sahibkarlığın inkişafına dövlət himayəsi ilə bağlı ölkəmizdə görülmüş işlərlə tanış olan Henninq Şerf və Almaniya Texniki Əməkdaşlıq Cəmiyyətinin MDB ölkələri üzrə hüquq layihələrinin rəhbəri professor Rolf Kniperin hüquqi şəxslərin dövlət qeydiyyatı və digər əlaqəli sahələr üzrə Almaniya təcrübəsi barədə geniş mühazirələri dinlənilmişdir.
Eyni zamanda, «Azərbaycan ədliyyəsinin tarixi muzeyi», Azərbaycan-Almaniya münasibətlərinə həsr olunmuş maraqlı ekspozisiyalarla tanış olan almaniyalı qonaqlara Azərbaycan dövləti, onun hüquq sistemi və ölkəmizin başçısının rəhbərliyi ilə aparılan islahatlar, Azərbaycan-Almaniya əlaqələri, Ermənistan-Azərbaycan, Dağlıq Qarabağ münaqişəsi ilə bağlı alman dilində hazırlanmış xüsusi vəsaitlər təqdim olunmuşdur.
Səfər çərçivəsində qonaq Azərbaycan Respublikası Konstitusiya Məhkəməsinin sədri Fərhad Abdullayev, baş prokuror Zakir Qaralov, nəqliyyat naziri Ziya Məmmədov, mədəniyyət naziri Polad Bülbüloğlu, Bakı Şəhəri İcra Hakimiyyətinin başçısı Hacıbala Abutalıbov ilə də görüşlər keçirmiş, Konstitusiya Məhkəməsi, prokurorluq və nəqliyyat işçiləri qarşısında mühazərələrlə çıxış etmiş, səmərəli diskussiyalar keçirilmişdir.
Ölkəmizin müxtəlif bölgələrinə, o cümlədən Şəki, Şamaxı, İsmayıllı, Qəbələ rayonlarına səfər edən qonaq faydalı görüşlər keçirmiş, məhkəmələrin, ədliyyə, prokurorluq, yerli icra orqanları və bələdiyyələrin fəaliyyəti ilə tanış olmuşdur.
Qonağı Milli Məclisin sədri Murtuz Ələsgərov qəbul etmişdir.