AZƏRBAYCANIN KƏND TƏSƏRRÜFATI NAZİRİ TEHRANDA İQTİSADİ ƏMƏKDAŞLIQ TƏŞKİLATININ BAŞ KATİBİ İLƏ GÖRÜŞMÜŞDÜR
AZƏRTAC-ın xüsusi müxbir xəbər verir ki, İran İslam Respublikasının kənd təsərrüfatı naziri Məhəmmədrza İskəndərinin dəvəti ilə bu ölkədə səfərdə olan Azərbaycanın kənd təsərrüfatı naziri İsmət Abasovun rəhbərlik etdiyi nümayəndə heyəti Tehranda İqtisadi Əməkdaşlıq Təşkilatının (İƏT) Baş katibi Xurşid Ənvərlə görüşmüşdür.
Qonaqları səmimiyyətlə salamlayan Baş katib Xurşid Ənvər Azərbaycan xalqının ümummilli lideri Heydər Əliyevin ölkəmizin gələcəyi naminə gördüyü tarixi işlərdən xəbərdar olduğunu xatırladaraq demişdir ki, indi Prezident İlham Əliyevin həyata keçirdiyi düzgün siyasət Azərbaycanda özünəməxsus inkişaf prosesi yaratmışdır. Görkəmli siyasi xadim Heydər Əliyev Azərbaycanın İƏT-ə üzv olmasında maraqlı idi. İftixarla demək olar ki, hazırda ölkəniz İƏT-in ən fəal üzvlərindəndir.
Nazir İsmət Abasov Baş katibin ulu öndər Heydər Əliyev və dövlətimizin başçısı İlham Əliyev haqqında söylədiyi xoş sözlərə görə təşəkkürünü bildirdi. O dedi ki, Azərbaycan bütün beynəlxalq təşkilatlarla hərtərəfli əməkdaşlığa üstünlük verir. Ölkəmiz kənd təsərrüfatı sahəsində əlaqələrin genişləndirilməsində maraqlıdır. Bunun üçün bütün imkanlardan səmərəli istifadə olunur.
Görüşdə bir sıra məsələlərə dair müzakirələr keçirilmiş, bu ilin sonunadək Bakıda keçirilməsi nəzərdə tutulan İƏT-ə üzv olan ölkələrin kənd təsərrüfatı nazirlərinin toplantısı barədə fikir mübadiləsi aparılmışdır.
Azərbaycanın Tehrandakı səfiri Abbasəli Həsənov görüşdə iştirak etmişdir.
Bölmənin digər xəbərləri
