Kiyev, 23 oktyabr (AZƏRTAC). Oktyabrın 22-23-də Azərbaycanın Ukraynadakı səfiri Eynulla Mədətli Ukraynanın Krım Muxtar Respublikası (KMR) Nazirlər Sovetinin sədri Anatoli Mogilyovun dəvəti ilə ölkənin bu regionunda işgüzar səfərdə olmuşdur. Bu barədə AZƏRTAC-a diplomatik nümayəndəliyimizdən bildirmişlər.

Səfər çərçivəsində oktyabrın 22-də Simferopolda Azərbaycan diplomatı KMR Nazirlər Sovetinin rəhbəri Anatoli Mogilyovla görüşmüşdür.

Muxtar respublika hökumətinin sədri Azərbaycan dövlətinin başçısı İlham Əliyevin yenidən Prezident seçilməsi münasibətilə diplomatımızı ürəkdən təbrik etmiş, Azərbaycanın liderinə ali dövlət vəzifəsində xalqın rifahının yüksəlməsi və ölkənin tərəqqisi naminə uğurlar arzulamışdır.

Daha sonra A.Mogilyov qeyd etmişdir ki, Krım ilə Azərbaycanın mühüm sahələrdə regional əməkdaşlığı inkişaf etdirmək üçün böyük potensialı vardır.

Öz növbəsində səfir Azərbaycan Prezidenti İlham Əliyevin seçkilərdə qələbə qazanması ilə əlaqədar onun ünvanına söylədiyi səmimi təbriklərə görə A.Mogilyova, habelə Muxtar Respublikanın ərazisində yaşayan Azərbaycan diasporunun dəstəklənməsinə görə, şəxsən ona və Krım hökumətinə səmimi minnətdarlığını bildirmişdir. Ukraynadakı diplomatik nümayəndəliyimizin başçısı demişdir: “Diasporumuz özünü burada öz evindəki kimi hiss edir. Biz burada xalqlarımızı birləşdirməyə, onların arasında əlaqələri möhkəmləndirməyə imkan verən tədbirlər keçiririk”.

Danışıqlar zamanı müsahiblər humanitar sahədə və sanatoriya-kurort kompleksi sahəsində əməkdaşlıq perspektivlərini də müzakirə etmişlər.

Bizim tərəfdən görüşdə “Ukrayna Azərbaycanlılarının Birləşmiş Diasporu” Ümumukrayna İctimai Təşkilatının sədri Hikmət Cavadov və “Vətən” - Krımdakı Azərbaycanlılar Konqresinin başçısı Hafiz Abbasov iştirak etmişlər.

Sonra E.Mədətli “Krım” Dövlət Teleradio Şirkətində (DTRŞ) olmuş, qurumun baş direktoru Stepan Qulevatı ilə görüşmüşdür. Baş direktor Azərbaycan diplomatına teleradio şirkətindən danışmışdır.

Səfir S.Qulevatıya azərbaycanlı həmkarları ilə sıx yaradıcılıq əlaqələri yaratmağı təklif etmişdir. Danışıqlar zamanı tərəflər yekdilliklə belə qərara gəlmişlər ki, “Krım” DTRŞ ilə Naxçıvan Muxtar Respublikasının Dövlət Teleradio Şirkəti arasında tərəfdaşlıq, profil əlaqələri yaradılsın.

Həmsöhbətlər möhkəm əmin olduqlarını bildirmişlər ki, birgə proqramlar, telekörpülər və s. Krımın və Naxçıvanın turizm mərkəzləri kimi təbliğinə və bütövlükdə ikitərəfli turizm sənayesinə fəal kömək göstərəcəkdir.

Görüşdə Krımın Azərbaycan icmasının sədri Rəhim Hümbətov iştirak etmişdir.

Həmin gün axşam Simferopolda səfir Azərbaycanın görkəmli türkoloq alimi, şair və ictimai xadimi Bəkir Çobanzadənin anadan olmasının 120 illiyi münasibətilə Ukraynanın Krım Akademik Musiqili Teatrında keçirilmiş təntənəli gecədə iştirak etmişdir.

Diplomatik nümayəndəliyimizin başçısı tədbirin rəsmi hissəsindəki çıxışında onun təşkilatçılarına, ilk növbədə KMR Nazirlər Sovetinin sədri Anatoli Mogilyova səmimi minnətdarlığını bildirmiş, Azərbaycanın tanınmış türkoloq alimi və ictimai xadimi Bəkir Çobanzadənin həyat və fəaliyyətindən danışmışdır.

Teatrda həmçinin B.Çobanzadəyə həsr olunmuş sərgi açılmışdır. Ekspozisiyada əlyazmalar, fotoşəkillər, arxiv materialı, habelə müasir krım-tatar rəssamları Ramiz Netovkinin (B.Çobanzadənin həyat və fəaliyyətinə, “Şanlı həyat” poemasına həsr olunmuş silsilə əsərlər), müəllimə Aliyə Veliullun əsərləri, B.Çobanzadənin şeirlərinə Zarema Trasimovanın və Krım şairi Sergey Drujininin tərcümələr məcmuəsinə Alim Hüseynovun yaratdığı illüstrasiyalar nümayiş etdirilmişdir.

Zeynal Ağazadə

AZƏRTAC-ın xüsusi müxbiri

Kiyev