Azərbaycanlı alim Astana şəhərində elmi ezamiyyətdə olub
Bakı. 23 sentyabr, AZƏRTAC
Azərbaycan Milli Elmlər Akademiyası (AMEA) Nizami adına Ədəbiyyat İnstitutunun ədəbiyyat nəzəriyyəsi şöbəsinin müdiri, professor Tahirə Məmməd Qazaxıstanın Astana şəhərində Azərbaycan Respublikasının Prezidenti yanında Elmin İnkişafı Fondunun maliyyə yardımı ilə yerinə yetirilən, “Ədəbiyyat nəzəriyyəsi: inkişaf mərhələləri və problemlər” adlı layihəsi ilə bağlı elmi ezamiyyətdə olub.
İnstitutdan AZƏRTAC-a bildiriblər ki, ezamiyyət müddətində Beynəlxalq Türk Akademiyasında T.Məmmədin rəhbəri olduğu layihənin təqdimatı keçirilib. Tədbirdə layihə barədə məlumat verilib, mütəxəssislərlə fikir mübadiləsi aparılıb.
Azərbaycanlı alim, həmçinin Beynəlxalq Türk Akademiyasının və Qazaxıstan Milli Elmi Kitabxanasının kitabxanalarında mövzu ilə bağlı tədqiqatlar da aparıb.
Bölmənin digər xəbərləri
