CƏMİYYƏT
“Bakı-2017” və Formula-1 yarışı ilə əlaqədar ölkəmizə gələn əcnəbilərin miqrasiya məsələləri təhlil edilib
Bakı, 15 aprel, AZƏRTAC
Aprelin 15-də Dövlət Miqrasiya Xidmətində (DMX) 2017-ci ilin birinci rübünün yekunlarına həsr olunmuş xidməti müşavirə keçirilib.
DMX-nin mətbuat xidmətindən AZƏRTAC-a bildiriblər ki, qurumun struktur bölmələrinin rəhbərlərinin iştirakı ilə keçirilən müşavirədə Dövlət Miqrasiya Xidmətinin rəisi Firudin Nəbiyev hesabat məruzəsi ilə çıxış edib.
Xidmət rəisi ölkəmizdə əsası ümummilli lider Heydər Əliyev tərəfindən qoyulmuş inkişaf strategiyasına uyğun olaraq, Prezident, Silahlı Qüvvələrin Ali Baş Komandanı İlham Əliyevin rəhbərliyi ilə ötən dövrdə qazanılan nailiyyətlərdən bəhs edib. F.Nəbiyev vurğulayıb ki, dünyada baş verən iqtisadi böhrana baxmayaraq, 2017-ci ilin birinci rübü respublikamız üçün iqtisadi inkişaf üzərində formalaşan möhkəm ictimai-siyasi sabitlik baxımından uğurlu olub.
Hesabat müşavirəsində bir sıra beynəlxalq tədbirlərə Azərbaycanın yüksək səviyyədə ev sahibliyi etməsi və bu ilin mayında Bakıda keçiriləcək “Bakı-2017” IV İslam Həmrəyliyi Oyunları, eləcə də Formula-1 Azərbaycan Qran-Prisi yarışı və digər mötəbər layihələrlə bağlı ölkəmizə təşrif buyuran əcnəbilərin və vətəndaşlığı olmayan şəxslərin respublikamıza sərbəst gəlməsinin və getməsinin təşkili, miqrasiya ilə bağlı məsələlərin operativ şəkildə həlli istiqamətində Dövlət Miqrasiya Xidməti tərəfindən görülmüş işlər qeyd olunub və qarşıda duran vəzifələr təhlil edilib.
Xidmət rəisi əcnəbilərin və vətəndaşlığı olmayan şəxslərin rahatlıqlarının təmin edilməsi baxımından miqrasiya qanunvericiliyinin təkmilləşdirilməsi istiqamətində həyata keçirilmiş fəaliyyətə toxunub. Bildirib ki, sosial, iqtisadi, siyasi, mədəni, bir sözlə, bütün sahələrdə ildən-ilə əldə edilən yüksək nəticələr Azərbaycanın qüdrətini daha da artırmaqdadır. Bu uğurların əsasında uzaqgörənliklə düşünülmüş və uğurla reallaşdırılan dövlət siyasəti dayanır.
Miqrantlar adətən iqtisadi cəhətdən yüksək inkişaf etmiş ölkələrə üz tuturlar. Turizm sektorunun inkişafı ilə bağlı görülən işlər, “ASAN Viza” sisteminin tətbiqi, sabitlik Azərbaycana səfər edən əcnəbilərin sayının kifayət qədər artmasına səbəb olub. Vahid Miqrasiya Məlumat Sistemi vasitəsilə müəyyənləşdirilib ki, 2017-ci ilin birinci rübü ərzində 399 min 429 əcnəbi və vətəndaşlığı olmayan şəxsin ölkə ərazisinə 557 min 628 girişi və 398 min 295 nəfər olmaqla ölkə ərazisindən 557 min 461 əcnəbi və vətəndaşlığı olmayan şəxsin çıxışı qeydə alınıb. Rüb ərzində ölkədə qalma müddətinə müvafiq olaraq, 146 min 920 əcnəbi və vətəndaşlığı olmayan şəxs olduğu yer üzrə qeydiyyata alınmaqla bağlı müraciət edib.
Hesabat dövründə DMX-yə Azərbaycan Respublikası ərazisində olma və yaşama icazələrinin alınması, haqqı ödənilən əmək fəaliyyətinin həyata keçirilməsi üçün iş icazələrinin alınması, qaçqın statusunun müəyyənləşdirilməsi, Azərbaycan Respublikasının vətəndaşlığına qəbul, bərpa, xitam və vətəndaşlıq mənsubiyyətinin müəyyənləşdirilməsi ilə bağlı 22 min 164 müraciət daxil olub. Müraciətlərin hər biri ayrı-ayrılıqda qanunvericiliyin tələblərinə uyğun olaraq araşdırılıb və müvafiq qərarlar qəbul edilib.
F.Nəbiyev Xidmətin əldə etdiyi nailiyyətlərin Prezident İlham Əliyev tərəfindən göstərilən diqqət və qayğının nəticəsində mümkün olduğunu vurğulayıb.
Xidmət rəisi Nazirlər Kabinetinin 2017-cı ilin birinci rübünün yekunlarına və qarşıda duran vəzifələrə həsr olunan iclasında Prezident İlham Əliyevin verdiyi konkret göstərişləri xatırladıb. Bildirib ki, qarşıya qoyulmuş vəzifələrin vaxtında və yüksək peşəkarlıqla yerinə yetirilməsi üçün hər bir miqrasiya əməkdaşı fəaliyyətini ciddi tələbkarlıq şəraitində, günün tələbləri səviyyəsində qurmalı, dövlət başçısının göstərdiyi etimadı doğrultmalıdır.
Sonra struktur bölmə rəhbərlərinin məruzələri dinlənilib.
Müşavirəyə yekun vuran Xidmət rəisi əminliklə bildirib ki, “bir pəncərə” prinsipi üzrə vahid dövlət orqanının səlahiyyətlərini həyata keçirən Dövlət Miqrasiya Xidməti müraciət edənlərin məmnunluğunun təmin edilməsi, dövlətimizin təhlükəsizliyi, daxili əmək bazarının qorunması və ölkə iqtisadiyyatının inkişafına töhfə vermək kimi vəzifə və tapşırıqları bundan sonra da müvəffəqiyyətlə yerinə yetirəcək.