Bakıda “Beynəlxalq Nobel Akademiyası” və “Etnomir” layihələrinin təqdimatı olub
Bakı, 10 mart, AZƏRTAC
Nobellər İrsinin Bakı Fondunun təşkilatçılığı ilə “Beynəlxalq Nobel Akademiyası” və “Etnomir” layihələrinin təqdimatı olub.
AZƏRTAC xəbər verir ki, tədbirdə Nobellər İrsinin Bakı Fondunun sədri Toğrul Bağırov layihələr barədə ətraflı məlumat verib. Diqqətə çatdırılıb ki, Beynəlxalq Nobel Akademiyası İsveçrədə Nobel qardaşları ailəsinin üzvü Filip Nobelin təşəbbüsü və Nobel İrsinin Bakı Fondunun iştirakı ilə yaradılıb. Akademiya beynəlxalq hüquq, iqtisadiyyat, maliyyə, eləcə də innovasiya, bakalavr və magistr proqramları çərçivəsində mütəxəssislər hazırlayır.
“Mədəniyyətlərin dialoqu - vahid dünya” fondunun prezidenti, ”Etnomir” layihəsinin rəhbəri Ruslan Bayramov bildirib ki, layihə çərçivəsində Gədəbəyin Novoivanovka kəndində 2006-ci ildə rus mədəniyyət muzeyi istifadəyə verilib. “Bəşəriyyətin dahi müəllimləri” layihəsi çərçivəsində isə Nizami Gəncəvinin heykəli ucaldılıb. Gələcəkdə müxtəlif ölkələrdə salınan etnoqrafiya parkının ərazisində ayrıca Azərbaycan Evinin tikintisi planlaşdırılır. Eləcə də Bakı yaxınlığında “Etnomir” etnoqrafiya park muzeyinin yaradılması da nəzərdə tutulur.
Tədbir çərçivəsində Nobellər İrsinin Bakı Fonduna “Mədəniyyətlərin dialoqu - vahid dünya” fondu tərəfindən heykəltəraş Aleksey Leonovun hazırladığı, Alfred Nobelin kiçik heykəli hədiyyə edilib.
Bölmənin digər xəbərləri
