Bakı, 25 iyun (AZƏRTAC). Azərbaycan Respublikası Silahlı Qüvvələrinin yaradılmasının 95-ci ildönümü münasibətilə paytaxtda keçiriləcək hərbi paradla bağlı Bakı şəhərinin bəzi küçə və prospektlərində nəqliyyatın hərəkəti tam məhdudlaşdırılacaqdır.

Bakı Şəhər Dövlət Yol Polisi İdarəsinin bölmə rəisi, polis polkovnik-leytenantı Vaqif Əsədov AZƏRTAC-a bildirmişdir ki, Azərbaycan Respublikası Silahlı Qüvvələrinin yaradılmasının 95-ci ildönümü münasibətilə iyunun 26-da Bakı şəhərinin Azadlıq meydanında ağır zirehli texnikaların iştirakı ilə irimiqyaslı hərbi parad keçiriləcəkdir.

V.Əsədov demişdir ki, hərbi paradla əlaqədar iyunun 25-də axşam saatlarından paytaxtın Azadlıq meydanı, Neftçilər prospekti və ona paralel Üzeyir Hacıbəyli, Zərifə Əliyeva küçələri ilə kəsişən bütün küçə və yollarda avtomobillərin hərəkətinə məhdudiyyət qoyulacaq və istiqamətlər dəyişdiriləcəkdir.

Bundan əlavə, Azadlıq, Bülbül prospektləri, Kövkəb Səfərəliyeva, R.Zorge, A.S. Puşkin, Rəşid Behbudov, Rəsul Rza, Əziz Əliyev, Niyazi, Yusif Səfərov küçələrindən Neftçilər prospekti istiqamətində də avtomobillərin hərəkətinə məhdudiyyətlər qoyulacaqdır.

Afiyəddin Cəlilov küçəsi və Nobel prospekti kəsişməsindən Nəcəfqulu Rəfiyev küçəsindən keçməklə Xocalı, Babək prospektləri, 10-cu Zavod Dairəsi və digər istiqamətlərə, Yusif Səfərov və 28 May küçəsinin kəsişməsindən 28 May küçəsindən keçməklə Kövkəb Səfərəliyeva, Rəşid Behbudov və digər istiqamətlərə hərəkət istiqamətləri dəyişdiriləcəkdir.

Bakı-Salyan yolunun 14-cü kilometliyindən, 3-cü kənar dairəvi yol ilə istənilən istiqamət üzrə, Bayıl qəsəbəsindən Qurban Abbasov küçəsi ilə Teymur Elçin, Mehdi Hüseyn, Parlament prospekti və digər istiqamətlər üzrə, 20-ci sahə dairəsindən Dağüstü yolla Badamdar qəsəbəsi, Mikayıl Müşfiq küçəsi, Mətbuat prospekti və digər istiqamətlərə hərəkətin istiqaməti dəyişdiriləcəkdir.

Bölgələrdən gələn avtomobil sürücülərinə bir daha müraciət edilərək bildirilir ki, hərbi paradın keçirilməsi ilə əlaqədar olaraq Bibiheybət və Salyan şosesindən istifadə etməsinlər. Bakı 3-cü kənar dairəvi yol ilə hərəkətlərini davam etdirsinlər. Ən yaxşı halda isə tədbir başlayandan qurtaranadək bu istiqamətlər üzrə şəxsi avtomobillərdən mümkün qədər istifadə edilməsin.

Əhalidən, avtomobil sahiblərindən və sürücülərdən xahiş olunur ki, iyunun 26-da hərbi paradın keçirildiyi ərazilərə yaxın məsafələrdə sıxlığın, tıxacların, yol qəzalarının yaranmaması üçün ictimai nəqliyyat vasitələrindən istifadəyə üstünlük versinlər.