REGİONLAR
Bakıda kənd təsərrüfatı məhsullarının növbəti satış yarmarkaları keçirilmişdir
Bakı, 24 dekabr (AZƏRTAC). Dekabrın 24-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Əlamətdar bayramlar ərəfəsində şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara mövsümə uyğun olaraq əsasən meyvə-tərəvəz məhsulları çıxarılmışdı.
“Təzə bazar” MMC-nin həyətindəki yarmarkada alıcıların və satıcıların rahatlığı üçün hər cür şərait yaradılmış, məhsulların keyfiyyəti sanitariya-gigiyena nəzarətindən keçirilmişdi.
Burada şəhər sakinlərinə Sabirabad, Gədəbəy, Hacıqabul və digər rayonlardan gətirilmiş 10 tondan çox məhsul, o cümlədən 1 ton ət, 0,5 ton ağartı, 2,5 ton tərəvəz, 3 ton kartof, 1 ton bostan məhsulları, 2,5 ton meyvə, 0,2 ton taxıl məhsulları, 2 min ədəd yumurta təklif olunurdu. Alıcılar məhsulların keyfiyyətindən və qiymətindən razılıq edirdilər.
Kənd Təsərrüfatı Nazirliyinin nümayəndəsi Zakir Bağırov dedi ki, yarmarkadakı qiymətlər bazardakından 20-25 faiz ucuzdur. Burada qoyun ətinin kiloqramı 5 manat 50 qəpiyə, mal əti 5 manata, kələm və soğan 30-40, kartof 40-70, yumurtanın biri 9 qəpiyə və s. satılır.
Yasamal rayonunda, Bakı Rabitə və Nəqliyyat Kollecinin həyətində təşkil olunan yarmarkada satış üçün Salyan, Qusar, Astara, Şabran və Quba rayonlarından 84,2 ton meyvə-tərəvəz, ət və ağartı məhsulları gətirilmişdi.
Kənd Təsərrüfatı Nazirliyinin nümayəndəsi Saleh Zərbəliyev məlumat verdi ki, bayramqabağı yarmarkada bostan-tərəvəz məhsulları, o cümlədən xiyar, pomidor, balqabaq, həmçinin mövsümə uyğun meyvələr, xüsusilə nar, heyva, alma, xurma, müxtəlif çərəzlər və s. üstünlük təşkil edir. Məhsullar bazarlardakından 25-30 faiz ucuz satılır. Alıcılar qiymətlərdən razılıq edirlər.
Badamdar qəsəbəsinin mərkəzində, 239 nömrəli məktəbin yaxınlığındakı yarmarkada alıcılara Ağdaş, Salyan, Masallı və digər rayonlardan gətirilmiş 15 tondan çox müxtəlif çeşidli kənd təsərrüfatı məhsulu - naringi, xurma, qoz, fındıq, kələm, soğan, kartof, ət, toyuq, konserv, arıçılıq məhsulları təklif olunurdu.
Kənd Təsərrüfatı Nazirliyinin nümayəndəsi Məmməd Həziyevin sözlərinə görə, yarmarkada əhalinin daha çox ehtiyac duyduğu məhsullara üstünlük verilir və onların həcmi get-gedə artırılır. Becərdikləri məhsulları burada satmaq fermerlərimizə sərf edir, çünki mallarını əlavə xərclər ödəmədən pula çevirə bilirlər.
Qəsəbə sakinləri bazarlardakından xeyli ucuz satılan məhsulları həvəslə alır, keyfiyyətli və ucuz məhsul gətirmiş fermerlərə təşəkkür edirdilər.
Kənd Təsərrüfatı Nazirliyinin nümayəndəsi Mustafa Rüstəmovun verdiyi məlumata görə, Suraxanı rayonu ərazisində təşkil olunmuş yarmarkalarda - “Günəş” ticarət mərkəzində (42,6 ton) və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində (3,2 ton) satışa Kürdəmir, Samux, Quba, Biləsuvar, Cəlilabad, Lənkəran və Balakən rayonlarından gətirilmiş ümumilikdə 45,8 ton məhsul çıxarılmışdır. Hər iki yarmarkada nar, heyva, xurma, naringi, alma, pomidor, xiyar və digər mövsümi məhsulların alıcıları çoxluq təşkil edirdi. Bazarlarla müqayisədə qiymətlər 20-25 faiz ucuzdur. Məhsulların keyfiyyəti ciddi surətdə yoxlanılır, ət və süd məhsulları baytar müayinəsindən keçirilir.
Xətai rayonunda “Bakı” kinoteatrının yaxınlığındakı yarmarkada Ağcabədi, Salyan, Biləsuvar, Qəbələ, Qax, Şəmkir, Kürdəmir, Quba, Astara rayonlarından gətirilmiş 196 ton meyvə-tərəvəz, ət və süd məhsulları satılırdı.
Kənd Təsərrüfatı Nazirliyinin nümayəndəsi Oqtay Hüseynovun sözlərinə görə, yarmarkada məhsulların qiymətləri bazarlardakından 20-30 faiz ucuzdur. Burada sərfəli qiymətə kartof, soğan, kələm, kök, çuğundur, xurma, naringi, pomidor, xiyar, alma, nar, üzüm və digər məhsullar təklif olunur.
Şəhər sakinləri yarmarkada satılan məhsulların qiymətindən və keyfiyyətindən razıdırlar.
Kənd Təsərrüfatı Nazirliyinin nümayəndəsi Fəxrət Eminov bildirdi ki, şənbə günü Nərimanov rayonu ərazisindəki Ə.Əliyev küçəsində təşkil olunmuş yarmarkaya Xaçmaz, Tərtər, İmişli, Salyan, Beyləqan, Oğuz rayonlarından 51,8 ton kənd təsərrüfatı məhsulları və Giləzi broyler fabrikindən 10 min ədəd yumurta gətirilmişdir.
Həmişə olduğu kimi, Yeni il ərəfəsində də yarmarkadakı əksər məhsulları almaq üçün növbə düzülmüşdü. Alıcılar məhsulların nəinki təzə və keyfiyyətli, eyni zamanda bazar qiymətlərindən 25-30 faiz ucuz qiymətə olmasından razılıq edirdilər. Satışa çıxarılmış məhsullar arasında ağartı və broyler məhsulları - toyuq və yumurtaya da tələbatın çox olduğu nəzərə çarpırdı. Çeşidlərin bolluğu, məhsulların keyfiyyətli və münasib qiymətə olması alıcıların ürəyincə idi.
Nərimanov Rayon İcra Hakimiyyətinin və Kənd Təsərrüfatı Nazirliyinin nümayəndələri yarmarkada qayda-qanuna nəzarət edirdilər.
Binəqədi rayonu ərazisində, 6 nömrəli Bakı Texniki Peşə Liseyinin qarşısındakı yarmarkada müxtəlif çeşiddə meyvə-tərəvəzlər, o cümlədən alma, nar, kartof, kələm, kök, həmçinin ağartı məhsulları bolluğu ilk baxışdan nəzərə çarpırdı. Ağstafa, Siyəzən, Goranboy, Bərdə rayonlarının fermerləri həmin məhsulları alıcılara bazardakından 20-30 faiz ucuz qiymətə təklif edirdilər.
Kənd Təsərrüfatı Nazirliyinin nümayəndəsi Qadir Həsənov bildirdi ki, yarmarkaya 21 tonadək meyvə-tərəvəz və bostan məhsulları gətirilmişdir.