BAKIDA KƏND TƏSƏRRÜFATI MƏHSULLARININ NÖVBƏTİ SATIŞ-YARMARKALARI KEÇİRİLMİŞDİR
AZƏRTAC xəbər verir ki, mayın 3-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz və bostan məhsulları çıxarılmışdı.
“Təzə bazar” MMC-nin həyətindəki yarmarkaya Sabirabad, Zərdab, Gədəbəy, Hacıqabul və Göyçay rayonlarından müxtəlif çeşidli kənd təsərrüfatı məhsulları gətirilmişdi.
Kənd Təsərrüfatı Nazirliyinin nümayəndəsi Fərhad Qəmbərovun verdiyi məlumata görə, şənbə günü burada əhaliyə 16,6 ton məhsul, o cümlədən 3 ton ət, 0,3 ton ağartı, 5 ton tərəvəz, 7 ton kartof, 0,2 ton bostan bitkisi, 1 ton meyvə, 100 kiloqram bal təklif edilmişdir. Yarmarkada qiymətlər bazardakından 20-25 faiz aşağı olmuşdur. Mal ətinin kiloqramı 4 manata, qoyun əti 4 manat 20 qəpiyə, quş əti 3 manat 80 qəpiyə, kök 40-50 qəpiyə, kələm, çuğundur 50 qəpiyə, alma 80 qəpik-1 manat 20 qəpiyə, armud 1 manat-1 manat 50 qəpiyə, kartof 50-60 qəpiyə, bal 9-10 manata, yumurtanın bir ədədi 8 qəpiyə, turp 40 qəpiyə, pendir 2 manat 20-2 manat 40 qəpiyə, göyərtinin dəstəsi 10-15 qəpiyə, badımcan 80 qəpiyə satılmışdır.
Suraxanıda “Günəş” ticarət mərkəzindəki yarmarkada Balakən, Qobustan, Samux, Daşkəsən, Quba və Biləsuvar rayonlarının fermərləri satışa 30 tondan çox məhsul çıxarmışdılar.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkaya isə Cəlilabad rayonundan 5 ton məhsul gətirilmişdi.
Hər iki yarmarkada qiymətlər bazardakından 25-35 faiz ucuz idi.
Metronun “Əhmədli” stansiyasının yaxınlığında, Sarayevo küçəsində, “Bakı” kinoteatrının yanında “Bülbülə” kiçik müəssisəsinin “Azər” ticarət mərkəzindəki yarmarkada əhaliyə Salyan, Kürdəmir, Quba, Şəmkir, Ağcabədi, Qax, Biləsuvar, Daşkəsən və Qəbələ rayonlarından gətirilmiş müxtəlif çeşiddə məhsullar təklif olunurdu. Bolluq dərhal nəzərə çarpırdı. Burada tərəvəz, meyvə, konserv məhsulları, pendir, mal və qoyun əti bazardakından xeyli ucuz qiymətə satılırdı.
Kənd Təsərrüfatı Nazirliyinin nümayəndəsi Rafiq Nəcəfov bildirdi ki, bu gün rayonun ərazisində fəaliyyət göstərən yarmarkada satışa 140 tondan çox məhsul çıxarılmışdır. Satış-yarmarkaların xidmətindən minlərlə şəhər sakini istifadə edir. Həm alıcılar razı qalırlar, həm də fermerlər yetişdirdikləri məhsulları maneəsiz sata bilirlər. Bakılıların kənd təsərrüfatı məhsulları ilə təmin edilməsində, hər dəfə olduğu kimi, yenə də şəmkirlilər fərqlənirlər.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkaya Qazax və Ağsu rayonlarından gətirilmiş soğanın kiloqramı 20, alma 40, kartof 40-50 qəpiyə satılırdı. Burada başqa kənd təsərrüfatı məhsullarının da qiymətləri bazardakından xeyli ucuz idi.
Qazax Rayon İcra Hakimiyyətinin nümayəndəsi İman Məmmədov bildirmişdir ki, bu gün fermerlər yarmarkada satışa 31 tonadək meyvə-tərəvəz və süd məhsulları çıxarmışlar.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada da şəhər sakinlərinə müxtəlif çeşiddə kənd təsərrüfatı məhsulları təklif olunurdu. Qiymətləri bazardakından 45-50 faiz ucuz olan həmin məhsullar həvəslə alınırdı.
İşçi qrupunun rəhbəri Sabir Əhədovun verdiyi məlumata görə, Bərdə, Goranboy və Ağstafa fermerləri yarmarkaya 15 tondan artıq kök, çuğundur, kartof, kələm, alma, süd və digər məhsullar gətirmişlər.
A.Şərifzadə küçəsi, 194, metronun “İnşaatçılar” stansiyasının yaxınlığındakı yarmarkada satışa Salyan, Qusar, Dəvəçi, Astara və digər rayonlardan gətirilmiş 37 tona yaxın müxtəlif çeşidli kənd təsərrüfatı məhsulları çıxarılmışdı.
Yarmarkada naringi, limon və digər məhsullar satan astaralı Hidayət Şabanov bildirdi ki, iki ildir hər həftə ardıcıl olaraq bura məhsul gətirir. Təklif etdiyi malların yaxşı alındığını bildirən fermer indiyə qədər burada 15 tondan çox məhsul satmışdır.
Salyanlı Günəş Mirzəyev isə ilk dəfədir bura məhsul gətirir. Mal əti satan fermer yaradılmış şəraitdən olduqca razıdır.
Burada mal ətinin kiloqramı 4 manata, qoyun əti 4 manat 20 qəpiyə, quş əti 3 manat 60 -3 manat 80 qəpiyə, kök 40-50, kələm 50-60, alma 50 qəpik-1 manat 20 qəpiyə, armud 1 manat-1 manat 50 qəpiyə, kartof 50-60 qəpiyə, bal 9-10 manata, yumurtanın bir ədədi 8-9 qəpiyə satılırdı.
Alıcılar Şaban Dadaşov, Qurban Qurbanov və başqaları yaradılmış şəraitdən, məhsulun qiyməti və keyfiyyətindən razılıq edirdilər.
Badamdar qəsəbəsinin mərkəzində 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkaya Saatlı, Salyan, Ağdaş, Masallı və digər başqa rayonlardan 7 tondan çox kartof, soğan, kələm, alma, xiyar, mal əti və digər məhsullar gətirilmişdi.
Burada kartofun kiloqramı 40-50 qəpiyə, soğan 25-30 qəpiyə, kələm, alma 20 qəpiyə təklif edilirdi. Alıcılar məhsul bolluğunu yüksək qiymətləndirirdilər.
Kənd Təsərrüfatı Nazirliyinin nümayəndəsi Fərhad Eminovun verdiyi məlumata görə, Nərimanov rayonu, Keşlə ticarət mərkəzində təşkil olunmuş yarmarkada şənbə və bazar günləri paytaxt sakinlərinə Xaçmaz, Tərtər, İmişli, Tovuz, Astara, Beyləqan, Daşkəsən, Neftçala, Oğuz və Qobustan rayonlarından gətirilmiş 50,6 ton məhsul, o cümlədən 2,6 ton ət, 400 kiloqram ağartı, 24,5 ton tərəvəz, 6 ton kartof, 100 kiloqram konserv məhsulu, 17 ton meyvə, Giləzi, Goradil broyler fabriklərindən isə 10 min ədəd yumurta təklif olunmuşdur.
Yarmarkada göyərtinin dəstəsi 10 qəpiyə, soğanın kiloqramı 20, alma, çuğundur 40, kartof 40-50, kök 50, xiyar 70 qəpiyə, qoz 2 manat 20 qəpiyə, pomidor 1 manat 50 qəpiyə, mal əti 4 manata, qoyun əti 4 manat 20 qəpiyə, quş əti 3 manat 80 qəpiyə, pendir 2 manat 40 qəpiyə, yumurtanın bir ədədi 7 qəpiyə satılmışdır.
Alıcı Tükəzban Ömərova, Sənubər Alıyeva yarmarkada məhsulun keyfiyyətindən, qiymətlərin bazardakından 30-40 faiz ucuz olmasından razılıq edirdilər.
######
 |
 |
Bölmənin digər xəbərləri
