BAKIDA “QADINLAR VƏ İCTİMAİ SFERA” MÖVZUSUNDA BEYNƏLXALQ KONFRANS İŞƏ BAŞLAMIŞDIR
AZƏRTAC xəbər verir ki, iyunun 18-də Xəzər Universitetində “Qadınlar və ictimai sfera” mövzusunda üçgünlük beynəlxalq konfrans işə başlamışdır.
Niderlandın İnkişaf Tarixi Tədqiqatı üzrə Cənub-Cənub Mübadilə Proqramı “Gender Bərabərliyi və Qadın Təşəbbüsləri” İB universitetin təşkil etdiyi tədbirdə 16 ölkədən, o cümlədən Azərbaycan, Niderland, Hindistan, Türkiyə, Braziliya və Ukraynadan nümayəndələr iştirak edirlər.
Açılış mərasimində Xəzər Universitetinin təsisçisi və rektoru, professor Hamlet İsaxanlı mövzunun əhəmiyyətindən danışmış, iştirakçılara uğurlar arzulamışdır.
Proqramın həmsədri Şamil Ceppi təmsil etdiyi qurumun fəaliyyəti barədə ətraflı məlumat vermişdir.
Ailə, Qadın və Uşaq Problemləri üzrə Dövlət Komitəsi sədrinin müavini Aynur Sofiyeva cəmiyyətin tərəqqisində qadınların rolundan, ölkəmizdə qadınlara göstərilən diqqət və qayğıdan bəhs etmiş, müstəqil dövlətimizin banisi və yaradıcısı, ulu öndərimiz Heydər Əliyevin qadınların inkişafına daim böyük önəm verdiyini vurğulamışdır.
Sonra ictimai sferanın tarixi, strukturu və dəyişən dinamikası, qadının ictimai həyatda iştirakına cavab verən dəyişən şəraitlər və digər mövzular üzrə geniş müzakirələr aparılmışdır.
######
Bölmənin digər xəbərləri
