BAKIDA XƏZƏR BEYNƏLXALQ İNVESTİSİYA ŞİRKƏTİNİN BİRİNCİ İNVESTİSİYA KONFRANSI KEÇİRİLƏCƏKDİR
İqtisadi İnkişaf Nazirliyinin mətbuat xidmətindən AZƏRTAC-a bildirmişlər ki, iyunun 13-də Bakıda Xəzər Beynəlxalq İnvestisiya Şirkətinin (XBİŞ) birinci investisiya konfransı keçiriləcəkdir.
Tədbirdə potensial investorlarla müzakirələr, eləcə də şirkətin inkişaf perspektivləri ətrafında fikir mübadiləsi aparılacaqdır. Bundan başqa, şirkətin maliyyə və hüquq üzrə mütəxəssisləri, eləcə də Azərbaycanda İxracın və İnvestisiyaların Təşviqi Fondunun (AZPROMO) nümayəndələri potensial investorlara ölkə iqtisadiyyatı, biznes və qanunverici mühit barədə məlumat verəcəklər.
İştirakçılar Beynəlxalq Maliyyə Korporasiyası, Avropa Yenidənqurma və İnkişaf Bankı kimi maliyyə institutlarının nümayəndələri ilə işgüzar görüşlər keçirmək imkanı da əldə edəcəklər.
Xatırladaq ki, Xəzər Beynəlxalq İnvestisiya Şirkəti İslam İnkişaf Korporasiyası (İİK) və Azərbaycan İnvestisiya Şirkəti (AİŞ) tərəfindən Azərbaycanın qeyri-neft sektoruna sərmayə qoymaq məqsədilə təsis edilmişdir. Nizamnamə kapitalı 3,5 milyon ABŞ dolları olan qurumun mərkəzi ofisi Bakı şəhərində yerləşir. Şirkətdə AİŞ 25 faiz, İİK isə 75 faiz paya malikdir. XBİŞ-in nizamnamə kapitalının 70 milyon dollara çatdırılması nəzərdə tutulur.
Bölmənin digər xəbərləri
