Azərbaycan xalqının ümummilli lideri Heydər Əliyevin anadan olmasının 85 illik yubileyi Balakən rayonunun tarixinə, ulu öndərin xatirəsini daim uca tutan balakənlilərin yaddaşına həmişəlik həkk olunacaqdır.

AZƏRTAC-ın müxbiri xəbər verir ki, mayın 7-də, ümummilli liderimizin doğum günü ərəfəsində Balakən şəhərinin mərkəzində üçrəngli Azərbaycanın dövlət bayrağının qaldırılmasına həsr olunmuş təntənəli mərasim keçirilmişdir.

Mərasimdə Azərbaycan Respublikası Prezidenti İcra Aparatının ictimai-siyasi məsələlər şöbəsinin müdiri Əli Həsənov, Dövlət Neft Şirkətinin prezidenti Rövnəq Abdullayev, Milli Məclisin deputatları Yaqub Mahmudov, Rəbiyyət Aslanova, Dünyamin Xəlilov və digər qonaqlar, habelə rayon rəhbərliyi və ictimaiyyətin nümayəndələri iştirak etmişlər.

Mərasimi açan rayon icra hakimiyyətinin başçısı Asif Məmmədov ümummilli liderimiz Heydər Əliyevin anadan olmasının 85 illiyi münasibətilə respublikanın hər yerində olduğu kimi, Balakəndə də silsilə bayram tədbirlərinin həyata keçirildiyini, ulu öndərin əziz xatirəsinin ehtiramla yad edildiyini xüsusi vurğulamışdır. Ümummilli liderimizin doğum günü ərəfəsində Balakən şəhərinin mərkəzində Azərbaycanın dövlət bayrağının 72 metr yüksəkliyə qaldırılmasının rayonun ictimai-siyasi və mədəni həyatında çox əlamətdar hadisə olduğunu bildirən icra hakimiyyətinin başçısı milli bayrağımızın ikinci dəfə həyata qaytarılmasında ulu öndərimizin tarixi xidmətlərini xüsusi qeyd etmişdir. Bildirmişdir ki, məhz ümummilli liderimizin qətiyyəti sayəsində üçrəngli milli bayrağımız Azərbaycanın dövlət rəmzlərindən birinə çevrilmişdir.

Mərasim iştirakçılarını əlamətdar gün münasibətilə təbrik edən Milli Məclisin deputatı Rəbiyyət Aslanova əmin-amanlıq, rifah və səadət dolu günlərə görə xalqımızın yalnız bir insana - Azərbaycan tarixində misilsiz yeri olan ümummilli liderimiz Heydər Əliyevə borclu olduğunu xüsusi vurğulamışdır. Natiq Prezident İlham Əliyevin 2006-cı ilin aprelində Balakənə tarixi səfərindən sonra rayonda baş verən müsbət dəyişikliklərdən danışmış, aparılan genişmiqyaslı tikinti-quruculuq və abadlıq işlərinin, yeni iş yerlərinin açılması istiqamətində görülən tədbirlərin hər bir balakənlinin ürəyincə olduğunu xüsusi vurğulamışdır.

Mərasimdə çıxış edən Azərbaycan Respublikası Prezidenti İcra Aparatının ictimai-siyasi məsələlər şöbəsinin müdiri Əli Həsənov ümummilli liderimizin doğum günü ərəfəsində Balakəndə olmağından, bayram sevincini balakənlilərlə bölüşməyindən məmnunluq və şərəf duyduğunu bildirmiş, rayon sakinlərinə səmimi salamlarını çatdırmışdır.

Əli Həsənov bildirmişdir ki, Balakən Azərbaycanın, eləcə də Cənubi Qafqazın elə bir bölgəsidir ki, burada insanlar üçün, cəmiyyət üçün gərəkli hər şey vardır. Balakənlilər bu gözəl diyarda xoşbəxt həyat sürür, yaşayır, yaradır, inkişaf edirlər. Çox sevindirici haldır ki, rayonda aparılan quruculuq işlərinə sakinlər böyük həvəslə, kifayət qədər nikbin əhval-ruhiyyə ilə girişmişlər və biz bunu ürəkdən alqışlayırıq.

Balakənin adi bir rayon deyil, həm də ölkəmizin şimal-qərb sərhədi olduğunu qeyd edən Prezidentin İcra Aparatının şöbə müdiri Azərbaycan dövlətinin qərb dayaqlarının məhz bu rayondan başlandığını, dövlətçiliyimizin, milli maraqlarımızın qorunmasının bütün təzahürlərinin bu sərhəd rayonunda cəmləşdiyini xüsusi vurğulamışdır.

Ümummilli liderimiz Heydər Əliyevin Balakən rayonuna həmişə xüsusi diqqət yetirdiyini, qayğı göstərdiyini bildirən Ə.Həsənov hələ sovet hakimiyyəti dövründə Azərbaycanın imkanlarından geniş istifadə olunaraq, bu rayonda insanların məşğuliyyəti üçün yeni emal müəssisələrinin yaradılmasının, yeni məktəb binalarının, səhiyyə obyektlərinin, mədəniyyət ocaqlarının tikintisinin Azərbaycanın digər rayonlarına nisbətən daha sürətlə və diqqətlə həyata keçirildiyini xüsusi vurğulamışdır.

Natiq bildirmişdir ki, ümummilli liderimizin ötən əsrin 80-ci illərində Ümumittifaq büdcəsinə Yevlax-Balakən dəmir yolu xəttinin tikintisinin saldırılması uğrunda ortaya qoyduğu mücadilə o zaman çoxlarını narahat edirdi. İttifaq rəhbərliyi Balakən rayonuna çəkiləcək dəmir yolunun xərclərinin neçə illərdən, daha doğrusu neçə yüzillərdən sonra ödəniləcək sualını ulu öndər Heydər Əliyevin qarşısına tez-tez qoyurdu. Amma ümummilli liderimizin təkidi ilə dəmir yolunun çəkilməsi üçün lazım olan vəsait ayrıldı və yolun çəkilişinə başlanıldı. O zaman Balakəndən dəmir yolu ilə daşınacaq yüklər çox az idi və bunu əsaslandırmaq çox çətin idi. Amma Azərbaycanın gələcəyini, müstəqilliyini əvvəlcədən görən bir lider üçün nəyin daşınması önəmli deyildi. Əsas məqsəd bu bölgənin Bakı şəhəri ilə, Azərbaycanın digər regionları ilə bağlılığını təmin etmək idi.

Ümummilli liderimiz Heydər Əliyevin uzaqgörən və məqsədyönlü siyasətinin bu gün Prezident İlham Əliyev tərəfindən uğurla davam etdirildiyini bildirən Ə.Həsənov bu bölgənin, xüsusilə də Balakən rayonunun dövlət başçısının daim diqqət mərkəzində olduğunu, regionun iqtisadi inkişafı üçün ardıcıl tədbirlərin həyata keçirildiyini qeyd etmişdir. Natiq bildirmişdir ki, burada görülən işlər təkcə rayon üçün deyil, həm də ölkəmiz üçün çox əhəmiyyətlidir. Balakən rayonu Azərbaycanın, eləcə də Cənubi Qafqazın elə bir guşəsində yerləşir ki, burada görülən işlər həm də Azərbaycanın qüdrətini nümayiş etdirir. Bu rayona Dağıstandan, Gürcüstandan, həm də digər bölgələrdən çoxlu insan gəlir. Onlar bu rayonda görülən işlərə baxaraq, Azərbaycanın ümumi vəziyyətinə qiymət verirlər.

Çıxışının sonunda Ə.Həsənov demişdir: Əminəm ki, ümummilli liderimizin arzusu olan inkişaf etmiş və inkişaf etməli olan Balakən bu gün Azərbaycan Prezidentinin regionların sosial-iqtisadi inkişafına yönəldilmiş siyasətinin çərçivəsində daha da tərəqqi edəcəkdir.

Sonra Prezidentin İcra Aparatının ictimai-siyasi məsələlər şöbəsinin müdiri Əli Həsənov, Dövlət Neft Şirkətinin prezidenti Rövnəq Abdullayev, Milli Məclisin deputatları Yaqub Mahmudov, Rəbiyyət Aslanova, Dünyamin Xəlilov və rayon icra hakimiyyətinin başçısı Asif Məmmədov Azərbaycanın dövlət bayrağını yüksəkliklərə qaldıracaq qurğunun düyməsini basmış və üçrəngli milli bayrağımız Azərbaycanın dövlət himninin sədaları altında, mərasim iştirakçılarının alqış sədaları altında 72 metr yüksəkliyə qalxmışdır. Bayrağın eni 8, uzunluğu isə 14 metrdir. Bayraq dirəyinin diametri 1,5 metrdir. Bayraq küləyin istiqamətinə uyğun olaraq 360 dərəcə fırlanır. Azərbaycanda ən yüksəkdə dalğalanan bu bayraq Dövlət Neft Şirkətinin vəsaiti ilə Türkiyənin “Çepaş A-Ş” şirkəti tərəfindən hazırlanmış və qaldırılmışdır.

Daha sonra qonaqlar və rayon ictimaiyyətinin nümayəndələri ümummilli liderimiz Heydər Əliyevin adını daşıyan parka gələrək, dağüstü hissədə ulu öndərimizin xatirəsinə ucaldılmış möhtəşəm abidə-kompleksi ziyarət etmiş, önünə tər çiçəklər düzmüşlər.

######