Banqladeşdə sərt karantin rejimi yenidən uzadılıb
Pekin, 1 iyun, AZƏRTAC
Banqladeşdə COVID-19 pandemiyası ilə əlaqədar aprelin 5-də sərtləşdirilən karantin rejimi iyunun 6-dək uzadılıb.
AZƏRTAC xəbər verir ki, Nazirlər Kabinetinin açıqlamasında ölkədəki vəziyyət nəzərə alınaraq belə qərar qəbul edildiyi bildirilir. Son günlər yoluxma sayında azalma müşahidə olunsa da, təhlükənin hələ də davam etməsi hökuməti karantin rejimini yenidən uzatmağa vadar edib.
Banqladeşdə pandemiyanın ikinci dalğası ilə əlaqədar sərt karantin rejimi aprelin 5-də elan olunub, sonradan karantin rejimi bir neçə dəfə uzadılıb.
Banqladeşdə əhalinin yeni növ koronavirusa qarşı vaksinasiyası üçün COVAX təşəbbüsü çərçivəsində ölkəyə 100 min doza Pfizer/BioNtech peyvəndi gətirilib. Bu, “Sinopharm” və “AstraZeneca” şirkətlərinin peyvəndi ilə birlikdə Banqladeşdə tətbiq olunacaq 3-cü COVID-19 peyvəndidir.
Qeyd edək ki, Banqladeşin Səhiyyə Xidmətləri üzrə Baş İdarəsinin məlumatına əsasən, ötən gün ölkədə virusa 1765 yoluxma aşkarlanıb, 41 ölüm halı baş verib. İndiyədək ölkədə 802 mindən çox yoluxma, 12 min 660 ölüm qeydə alınıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
