BAŞ KONSULLUQDA SƏSVERMƏ MÜTƏŞƏKKİL KEÇDİ
Konstitusiyamızda dəyişikliklər edilməsi məqsədi ilə avqustun 24-də keçirilən referendum Azərbaycanın İstanbuldakı Baş konsulluğunda da müvəffəqiyyətlə başa çatmışdır. Səsverməyə gələn Azərbaycan vətəndaşları bunu müstəqillik əldə etmiş ölkəmizin ictimai-siyasi həyatında mühüm hadisə kimi qiymətləndirdilər. Əvvəlcədən vətəndaşlar arasında aparılan təşviqat işi öz müsbət nəticəsini vermişdir. Səsverməyə gələn vətəndaşlar yaxşı bilirdilər ki, referendum keçirilməsi haqqında Azərbaycan Respublikası Prezidentinin 22 iyun 2002-ci il tarixli Fərmanında göstərildiyi kimi, referendum aktı layihəsinin ümumxalq səsverməsinə çıxarılarkən respublikamızın insan hüquqları və əsas azadlıqlarının müdafiəsi haqqında Avropa Konvensiyasına qoşulmasından, ölkəmizdə məhkəmə islahatlarının həyata keçirilməsindən irəli gələn, Milli Məclisin fəaliyyətinin və seçki sisteminin təkmilləşdirilməsi ilə əlaqədar yeni müddəaların Konstitusiyada əks etdirilməsi zərurəti əsas tutulmuşdur.
Baş Konsulluqda yaradılmış referendum komissiyası avqustun 24-də Azərbaycan Respublikası vətəndaşlarının səsvermədə iştirak edərək öz iradələrini sərbəst şəkildə ifadə etmələrini təmin etmişdir.
Səsvermə səhər saat 8-də başlamış, İstanbulda və Baş konsulluğun əhatə etdiyi ərazilərdə yaşayan yüzlərlə vətəndaş məntəqəyə gələrək səs vermişdir. Uzaq yerdə yaşayan azərbaycanlıların konsulluğa gəlib səs vermələri üçün xüsusi nəqliyyat vasitələri ayrılmışdır.
Gün ərzində respublikamızdan İstanbula qonaq gələn vətəndaşlarımız da Baş konsulluqdakı məntəqədə səs vermişlər.
Bölmənin digər xəbərləri
