CƏMİYYƏT
Baş Prokuror yanında Korrupsiyaya Qarşı Mübarizə Baş İdarəsi ilin birinci yarısına dair hesabatını açıqlayıb
Bakı, 17 iyul (AZƏRTAC, Məmməd İsayev). İyulun 17-də Azərbaycan Respublikasının Baş Prokuroru yanında Korrupsiyaya Qarşı Mübarizə Baş İdarəsi tərəfindən 2014-cü ilin birinci yarısında korrupsiyaya qarşı mübarizə sahəsində görülmüş işlərlə bağlı kütləvi informasiya vasitələri və qeyri-hökumət təşkilatları nümayəndələrinin iştirakı ilə mətbuat konfransı keçirilib.
AZƏRTAC xəbər verir ki, tədbirdə Baş Prokuror yanında Korrupsiyaya Qarşı Mübarizə Baş İdarəsinin rəisi Kamran Əliyev və Korrupsiyaya Qarşı Mübarizə üzrə Komissiyanın katibi Vüsal Hüseynov görülmüş işlər barədə ətraflı məlumat veriblər.
Bildirilib ki, ümummilli lider Heydər Əliyevin müəyyənləşdirdiyi strateji kursun yeni müstəvidə mükəmməl konseptual əsaslarla davam etdirilməsi nəticəsində ötən dövrlərdə olduğu kimi, cari ilin birinci yarısında da bütün sahələrdə mühüm nailiyyətlər qazanılıb. Azərbaycan Prezidenti İlham Əliyevin siyasi iradəsi, əzm və qətiyyəti hesabına korrupsiyaya qarşı mübarizə sahəsində ölkədə görülən işlərin, həyata keçirilən islahatların, təşkilati və institusional tədbirlərin səmərəliliyi artıb.
Cari il mayın 27-də Azərbaycanın milli bayramı - Respublika Günü münasibətilə rəsmi qəbulda Prezident İlham Əliyevin korrupsiyaya və rüşvətxorluğa qarşı daha ciddi mübarizə aparıldığını, bu istiqamətdə nailiyyətlərin əldə olunduğunu və cəmiyyət tərəfindən yüksək qiymətləndirildiyini qeyd etməsi korrupsiyaya və rüşvətxorluğa qarşı mübarizə istiqamətində prokurorluq orqanları qarşısında çox mühüm vəzifələr qoyub.
Bildirilib ki, dövlətimizin başçısının iyunun 24-də Avropa Şurası Parlament Assambleyasının sessiyasındakı nitqində Azərbaycanın qurumun Nazirlər Komitəsinə sədrliyi dövründə insan hüquqlarının, qanunun aliliyinin qorunmasına və demokratiyaya güclü dəstək göstərəcəyini qeyd etməklə yanaşı, korrupsiyaya qarşı mübarizənin prioritet istiqamətlərdən biri olduğunu bildirməsi də məsuliyyətimizi artırıb.
Diqqətə çatdırılıb ki, prokurorluq orqanları korrupsiya ilə mübarizəni fəaliyyətinin prioritet xətti kimi müəyyənləşdirib. Baş Prokuror yanında Korrupsiyaya Qarşı Mübarizə Baş İdarəsi isə əvvəlki illərdə olduğu kimi, fəaliyyətini 2014-cü ilin birinci yarısında da uğurla davam etdirib. Bu müddətdə idarə tərəfindən vətəndaşların 1603 müraciətinə baxılıb, həmçinin 169 cinayət xarakterli material araşdırılıb. Həmin materialların 53 faizi üzrə cinayət işi başlanıb, digər məlumatlar üzrə isə zəruri qabaqlayıcı tədbirlərin görülməsi təmin edilib.
Hesabat dövründə Baş Prokuror yanında Korrupsiyaya Qarşı Mübarizə Baş İdarəsinin 161 saylı “Qaynar xətt” əlaqə mərkəzinə 2864 müraciət daxil olub. Müraciətlərin əksəriyyətinin müsbət həlli təmin edilməklə vətəndaşların pozulmuş hüquqları bərpa olunub, aşkarlanmış qanun pozuntularının aradan qaldırılması məqsədilə müvafiq təşkilatlara təqdimatlar göndərilib. Həmçinin müraciətlərin doqquzu üzrə Cinayət Məcəlləsinin müxtəlif maddələri ilə cinayət işləri başlanıb.
Ötən altı ayda keçirilmiş əməliyyat tədbirləri nəticəsində cinayət başında yaxalanan şəxslər barəsində altı, o cümlədən korrupsiya hüquqpozmaları ilə əlaqədar toplanmış materiallar üzrə üç cinayət işi başlanıb. Həmin işlərdən yeddisi üzrə ibtidai istintaq tamamlanaraq baxılması üçün aidiyyəti məhkəmələrə göndərilib.
Cinayət işləri Ağcabədi Pedaqoji Kollecinin direktoru Sahib Hüseynovun tələbədən sessiya imtahanlarından müsbət qiymət alması müqabilində 450 manat, Bakı şəhər Nizami rayonu 117 nömrəli mənzil kommunal-istismarı sahəsinin rəisi Bəşir Bəşirovun müvafiq sənədlərin verilməsi müqabilində vətəndaşdan iki min manat, “Merac Holdinq”in idarə heyətinin sədri Səbuhi Əliyevin zəlzələdən zərər çəkmiş ərazilərdə 204 evin yenidən tikilməsi üçün podrat işlərinin verilməsi müqabilində iyirmi min manat məbləğində rüşvət almaları və digər faktlarla əlaqədar olub.
Cari ilin birinci yarısında idarənin istintaq şöbəsi tərəfindən 147 şəxs barəsində 103 cinayət işinin istintaqı tamamlanaraq baxılması üçün aidiyyəti məhkəmələrə göndərilib. Həmin cinayət işlərindən 3 şəxs barəsində 2 iş rüşvət vermə, 4 şəxs barəsində 4 iş rüşvət alma, 16 şəxs barəsində 11 iş vəzifə səlahiyyətlərindən sui-istifadə etmə, 4 şəxs barəsində 4 iş vəzifə səlahiyyətlərini aşma, 7 şəxs barəsində 4 iş vəzifəli şəxsin səlahiyyətlərini mənimsəmə, 53 şəxs barəsində 38 iş mənimsəmə və israf etmə, 41 şəxs barəsində 25 iş dələduzluq və digər faktlarla əlaqədar olub.
Məhkəmələrə göndərilən cinayət işləri üzrə vurulmuş 11 milyon 870 min manat ziyandan istintaq müddətində 6 milyon 10 min manatı və ya 50,6 faizi ödənilib. Ziyanın qalan hissəsinin təqsirləndirilən şəxslərin əmlakları üzərinə həbs qoyulmaqla ödənilməsi üçün qanunla nəzərdə tutulmuş tədbirlər görülüb.
Hesabat dövründə korrupsiyaya qarşı mübarizə sahəsində idarə əməkdaşları tərəfindən bir sıra qabaqlayıcı tədbirlər həyata keçirilib.
“Korrupsiyaya qarşı mübarizəyə dair 2012-2015-ci illər üçün Milli Fəaliyyət Planı”nın müvafiq müddəalarının icrası qaydasında məktəbəqədər təhsil, bank, ekologiya və digər sahələrdə xarakterik korrupsiya hüquqpozmalarının aradan qaldırılması üçün qabaqlayıcı tədbirlərə dair təkliflər hazırlanaraq aidiyyəti təşkilatlara göndərilib. Həmçinin bir sıra hallarda vəzifəli şəxslər tərəfindən “Korrupsiyaya qarşı mübarizə haqqında” Qanunun tələblərinin pozularaq cinayət xarakteri daşımayan pozuntulara yol verildiyi müəyyənləşdirildiyindən həmin şəxslər barəsində “Prokurorluq haqqında” Qanunun 23-cü maddəsinə müvafiq olaraq aidiyyəti üzrə təqdimatlar verilib.
Bildirilib ki, korrupsiyaya qarşı mübarizə sahəsində beynəlxalq əməkdaşlığın zəruriliyini nəzərə alaraq hesabat dövründə idarə tərəfindən bu sahədə ixtisaslaşmış beynəlxalq qurumlar və digər ölkələrin müvafiq hüquq mühafizə orqanları ilə əlaqələrin daha da genişlənməsinə xüsusi diqqət yetirilib. Bu kontekstdə ölkəmizin Avropa Şurasının Nazirlər Komitəsinə sədrliyi ilə əlaqədar Azərbaycan Hökuməti və Avropa Şurası tərəfindən Avropa Şurasının Korrupsiyaya qarşı Mübarizə Aparan Dövlətlər Qrupu (GRECO) və Beynəlxalq Antikorrupsiya Akademiyasının (IACA) iştirakı ilə cari il iyunun 30-dan iyulun 1-dək Bakıda “Korrupsiyaya qarşı mübarizə: Beynəlxalq standartlar və milli təcrübələr” mövzusunda yüksək səviyyəli beynəlxalq konfransın keçirilməsinin əhəmiyyəti xüsusi vurğulanmalıdır.
Qeyd edilib ki, hesabat dövründə İqtisadi Əməkdaşlıq və İnkişaf Təşkilatı (OECD) ilə əlaqələr genişləndirilib. Bu il yanvarın 17-də Azərbaycan Respublikasının Baş Prokuroru yanında Korrupsiyaya Qarşı Mübarizə Baş İdarəsində OECD-nin Şərqi Avropa və Mərkəzi Asiya üzrə Antikorrupsiya Şəbəkəsinin İstanbul Fəaliyyət Planı tərəfindən ölkəmizin Üçüncü Dəyərləndirmə Raundunun birinci mərhələsini müvəffəqiyyətlə keçməsi ilə əlaqədar qəbul etdiyi hesabatın təqdimatı keçirilib. Bundan əlavə, hesabat dövründə Avropa Şurasının Korrupsiyaya Qarşı Mübarizə Aparan Dövlətlər Qrupu (GRECO) ilə Azərbaycan Respublikası arasında əməkdaşlıq uğurla davam etdirilmişdir. Cari il aprelin 15-dən 18-dək GRECO tərəfindən Azərbaycan Respublikasına IV dəyərləndirmə missiyası həyata keçirilib. Tədbirlə əlaqədar GRECO təşkilatının ekspertləri ölkəmizə işgüzar səfər ediblər.
Dəyərləndirmə missiyasının həyata keçirilməsi ilə bağlı Azərbaycan Respublikası Prezidenti Administrasiyası və GRECO təşkilatı tərəfindən hazırlanmış gündəliyə uyğun olaraq Baş Prokuror yanında Korrupsiyaya Qarşı Mübarizə Baş İdarəsinin inzibati binasında Korrupsiyaya Qarşı Mübarizə üzrə Komissiyanın katibliyinin, parlamentin və Məhkəmə-Hüquq Şurasının üzvlərinin, Konstitusiya Məhkəməsi, Ali Məhkəmə və digər instansiya məhkəmələrinin hakimlərinin, müvafiq nazirliklərin məsul əməkdaşlarının, ali təhsil müəssisələrinin müəllim heyətinin və vətəndaş cəmiyyəti təmsilçilərinin iştirakı ilə çoxsaylı görüşlər keçirilib.
Bildirilib ki, hesabat dövründə Beynəlxalq Prokurorlar Assosiasiyası (IAP) ilə əməkdaşlıq diqqət mərkəzində saxlanılıb. Cari il aprelin əvvəllərində Assosiasiyanın prezidenti və Avstriya baş prokurorunun müavini Gerhard Yaroşun başçılıq etdiyi nümayəndə heyəti ölkəmizdə işgüzar səfərdə olub.
Baş Prokuror yanında Korrupsiyaya Qarşı Mübarizə Baş İdarəsi korrupsiyaya qarşı mübarizə sahəsində nəzəriyyədə və praktikada mövcud çatışmazlıqların aradan qaldırılmasına istiqamətlənmiş, mühüm elmi araşdırmalarla məşğul olan Beynəlxalq Antikorrupsiya Akademiyası ilə də əməkdaşlığını uğurla davam etdirib. Ötən dövrdə idarənin əməkdaşları qurumun seminar və konfranslarında fəal iştirak ediblər.
Qeyd olunub ki, cari ilin birinci yarısında idarə tərəfindən, həmçinin Demokratiya və İqtisadi İnkişaf Naminə Təşkilat - GUAM, Avropa İttifaqının “Şərq Tərəfdaşlığı” Proqramı çərçivəsində demokratiya, yaxşı idarəçilik və sabitlik üzrə birinci çoxtərəfli platformanın nəzdində yaradılmış “Korrupsiyaya qarşı mübarizə üzrə Panel”, Avropa İttifaqı-Azərbaycan Əməkdaşlıq Komitəsi nəzdində fəaliyyət göstərən ədliyyə, azadlıq, təhlükəsizlik, insan hüquqları və demokratiya üzrə alt komitəsi çərçivəsində beynəlxalq əməkdaşlığın inkişaf etdirilməsinə xüsusi diqqət yetirilməklə idarə əməkdaşları həmin istiqamətlər üzrə konfrans, seminar, treninq, təlim və “dəyirmi masa”larda fəal iştirak ediblər.
Korrupsiyaya Qarşı Mübarizə Baş İdarəsi tərəfindən korrupsiyaya qarşı mübarizə fəaliyyətində qeyri-hökumət təşkilatları ilə sıx münasibətlərin qurulmasına xüsusi önəm verilib.
Cari il iyulun 10-da Azərbaycan Prezidenti İlham Əliyevin Nazirlər Kabinetinin 2014-cü ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş iclasında ölkəmizdə həyata keçirilən quruculuq işlərinə, iqtisadi, sosial və siyasi sahədə aparılan islahatlara kölgə salan, habelə əhalinin haqlı narazılığına səbəb olan rüşvətxorluq və korrupsiya kimi mənfi təzahürlərə qarşı daha ciddi mübarizə aparılması sahəsində verdiyi göstərişlərə uyğun olaraq Baş Prokuror yanında Korrupsiyaya Qarşı Mübarizə Baş İdarəsi tərəfindən bundan sonra da korrupsiya hüquqpozmalarını doğuran səbəb və şəraitin müəyyənləşdirilməsi və cinayətlərin qarşısının alınması istiqamətində sistemli, ardıcıl və qətiyyətli mübarizə tədbirlərinin davam etdirilməsi təmin olunacaqdır.
Sonra tədbirdə iştirak edən qeyri-hökumət təşkilatlarının nümayəndələri çıxış edərək korrupsiyaya qarşı mübarizə sahəsində Baş Prokuror yanında Korrupsiyaya Qarşı Mübarizə İdarəsinin cari ilin birinci yarısında gördüyü işləri müsbət dəyərləndiriblər.
Sonda KİV-lərin və QHT-lərin təmsilçilərinin sualları cavablandırılıb.