BDU tələbələri beynəlxalq məhkəmə müsabiqəsində hüquqi mövqelərini müdafiə ediblər
Bakı, 11 mart, AZƏRTAC
Bakı Dövlət Universitetinin(BDU) Hüquq fakültəsinin IV kurs tələbələri Kamil Abdullazadə, Nəzrin Sadıqova, Fatimə Məmmədova və Fazil Vəlizadə Yunanıstanın paytaxtı Afina şəhərində keçirilən “Helga Pedersen Moot Court Competition” beynəlxalq məhkəmə müsabiqəsində iştirak ediblər.
Universitetdən AZƏRTAC-a bildirilib ki, müxtəlif ölkələrdən Hüquq fakültələri tələbələrini bir araya gətirən müsabiqə insan hüquqları sahəsində Avropanın ən nüfuzlu tələbə məhkəmə simulyasiya yarışlarından biri hesab olunur.
Akademik proqram zamanı tələbələr insan hüquqlarının aktual məsələlərinə həsr olunmuş müzakirələrdə və ekspert çıxışlarında iştirak ediblər.
Müsabiqənin əsas mərhələləri olan şifahi çıxışlarda (oral pleadings) komandalar insan hüquqları ilə bağlı hipotetik məhkəmə işi üzrə tərəflərin mövqelərini müdafiə edərək hüquqi arqumentlərini irəli sürüblər.
BDU-nun Hüquq fakültəsinin komandası çıxışlarını Afina Apellyasiya Məhkəməsində keçirib və beynəlxalq münsiflər heyəti qarşısında öz hüquqi mövqelərini müdafiə ediblər.
Müsabiqədə iştirak edən tələbələrə sertifikatlar təqdim olunub.
Bölmənin digər xəbərləri
