“Beaume Transasia-2012” avtoturizm ekspedisiyası Azərbaycan ərazisindən keçəcəkdir
Bakı, 9 iyul (AZƏRTAC). “Beaume Transasia-2012” Beynəlxalq avtoturizm ekspedisiyası iyulun 21-dən 23-dək Azərbaycan ərazisindən keçəcəkdir.
Mədəniyyət və Turizm Nazirliyindən AZƏRTAC-a bildirmişlər ki, ümumilikdə beş ölkəni əhatə edəcək “Beaume Transasia-2012” avtoturizm ekspedisiyası Türkiyənin İstanbul şəhərindən start götürəcək və Gürcüstan, Azərbaycan, Rusiyanı əhatə etməklə, Çin Xalq Respublikasının Tyanjin vilayətində başa çatacaqdır.
Layihə Azərbaycanda fəaliyyət göstərən “Millennium Tourism&Congress DMC” və onunla tərəfdaş olan Malayziyanın “4x4 World Explorer Sdn Bhd” şirkətinin birgə əməkdaşlığı ilə reallaşdırılacaqdır.
“Millennium Tourism&Congress DMC”-nin direktoru Ruslan Quliyev bildirmişdir ki, bundan əvvəl adıçəkilən şirkətlə birlikdə həyata keçirdiyimiz “Kembara Bumi Suci” (“Müqəddəs yerlərə səyahət”) beynəlxalq mədəni piliqrim marşrutları layihəsi çərçivəsində baş tutan avtomoto yürüş uğurlu olduğuna görə, həmin şirkətlə işbirliyini davam etdirmək qərarına gəlmişik.
Direktor demişdir: “Bu layihənin müvəffəqiyyətlə həyata keçirilməsi Malayziyada fəaliyyət göstərən “4x4 World Explorer Sdn Bhd” şirkəti ilə aramızda daha bir layihənin reallaşmasına şərait yaratmışdır. Yeni layihədə nəzərdə tutulan marşrutun ümumi uzunluğu 17 min kilometr, müddəti 57 gündür. Marşrut Azərbaycanda 2 gecə, 3 gün olmaqla, iyulun 21-dən 23-dək davam edəcəkdir”.
Avtotur iştirakçıları ABŞ, Malayziya, Sinqapur, Yunanıstan, Norveç, Çin, Rusiya vətəndaşları olmaqla 37 nəfərdən ibarətdir. Turda 10 ədəd “4x4 Jeep” avtomobillərindən istifadə ediləcəkdir.
Proqrama uyğun olaraq qonaqlar Balakən-Şəki-Qəbələ-İsmayıllı-Şamaxı-Bakı istiqamətində hərəkət edəcəklər. Onlar marşrut üzərində yerləşən qədim tarixi və mədəni abidələri, əfsanəvi və dini məbədləri ziyarət edəcək, Azərbaycanın mədəniyyəti və turizm potensialı ilə yaxından tanış olacaqlar.
Ekspedisiyanın Azərbaycan hissəsinin yüksək səviyyədə həyata keçirilməsi üçün zəruri hazırlıq işləri görülür. Tur iştirakçılarının Azərbaycanda olduqları günlərdə media təmsilçilərinin və turizm şirkətləri nümayəndələrinin iştirakı ilə mətbuat konfransının təşkili, Mədəniyyət və Turizm Nazirliyinin turizm şöbəsində müxtəlif görüşlərin keçirilməsi nəzərdə tutulur.
Layihənin reallaşmasının əsas məqsədi ölkəmizdə turizm sektorunun inkişafı, Azərbaycanın turizm və mədəni-tarixi potensialı ilə yaxından tanışlıq və bu imkanları dünya miqyasında təbliğ etməkdir. Avtotur əvvəldən axıradək Malayziya televiziyası tərəfindən yayımlanacaqdır.
Bu mühüm avtoturda Azərbaycan tərəfinin əsas hədəfi belə beynəlxalq marşrutlarda ölkəmizin rolunu daha da artırmaq və bu layihələrin ayrılmaz tərkib hissəsinə çevirməkdən ibarətdir.
Layihənin təşkilatçıları əmindirlər ki, beynəlxalq ekspedisiyanın Azərbaycanı əhatə etməsi ölkəmizin yeni turizm istiqaməti kimi tanıdılmasına və respublikamıza turist axınının sürətlənməsinə töhfə verəcəkdir.
Bölmənin digər xəbərləri
