BƏRDƏDƏ QUŞLARIN KÜTLƏVİ TƏLƏFATI BARƏDƏ YAYILAN MƏLUMATLARIN HEÇ BİR ƏSASI YOXDUR
Kənd Təsərrüfatı Nazirliyi yanında Dövlət Baytarlıq Xidmətinin mətbuat mərkəzindən AZƏRTAC-a bildirmişlər ki, bəzi kütləvi informasiya vasitələrində Bərdə rayonunun kəndlərində ev quşlarının kütləvi tələfatının qeydə alınmasına dair məlumatlar yayılmışdır. Belə hallara daha çox Qılınclı kəndində rast gəlindiyi xatırladılır.
Bu informasiyadan dərhal sonra Dövlət Baytarlıq Xidmətinin mütəxəssisləri həmin bölgəyə ezam edilmişlər. Mütəxəssisələr yerli baytarlıq idarəsinin əməkdaşları ilə birlikdə rayonun kəndlərində olmuş, sakinlərlə görüşmüş və həyətlərdə saxlanılan quşların sağlamlığına baxış keçirmişlər. Araşdırmalar zamanı məlum olmuşdur ki, kəndlərin heç birində ev quşlarının kütləvi tələfatı baş verməmiş və yayılmış informasiyanın heç bir əsası yoxdur.
Dövlət Baytarlıq Xidməti əhalini yanlış məlumatlara inanmamağa çağırmaqla yanaşı, bir daha bildirir ki, monitorinqlər davam etdirilir və ölkəmizdə quş qripi virusu xəstəliyinə təsadüf olunmamışdır. Bundan əlavə, Dövlət Baytarlıq Xidməti sərhəd keçid məntəqələrində öz fəaliyyətini ciddi iş rejimində davam etdirir, xəstəlik baş verən ölkələrdən diri quş, quş məhsulları, yem və yem əlavələrinin gətirilməsinə qoyulmuş qadağaya xüsusi nəzarət edir. Hər bir rayon baytarlıq idarəsinə lazımi miqdarda dezinfeksiyaedici maddələr, xüsusi geyim və çiləyici avadanlıq çatdırılmışdır.
Dövlət Baytarlıq Xidməti ev quşlarının qapalı şəraitdə saxlanmasını məqsədəuyğun hesab etməklə, köçəri və çöl quşlarının ovlanmasına, satılmasına və onlardan qida məhsulu kimi istifadəsinə qoyduğu müvəqqəti məhdudiyyətin qüvvədə qaldığını bildirir.
Bölmənin digər xəbərləri
