REGİONLAR
Bərdədə tələbə adını qazanmış gənclərlə görüş keçirilib
Bərdə, 9 sentyabr, AZƏRTAC
Yeni Azərbaycan Partiyası (YAP) Bərdə rayon təşkilatında 600-dən yuxarı bal toplayaraq ali məktəblərə qəbul olunmuş bərdəli gənclərlə görüş keçirilib.
AZƏRTAC-ın bölgə müxbiri xəbər verir ki, tədbir iştirakçıları əvvəlcə xalqımızın ümummilli lideri Heydər Əliyevin abidəsi önünə tər güllər düzüb, dahi rəhbərin əziz xatirəsini ehtiramla anıblar.
Tədbirdə Qarabağ Regional Təhsil İdarəsinin Bərdə təhsil sektorunun müdiri Qurban Məmmədov Prezident İlham Əliyevin diqqət və qayğısı sayəsində son illər respublikamızın bütün regionlarında olduğu kimi Bərdə rayonunda da təhsilin inkişafı istiqamətində görülmüş işlərdən, əldə edilən uğurlardan danışıb. Bildirib ki, 2021-2022-ci tədris ilində Bərdə rayonunda 541 nəfər ali məktəblərə qəbul olub. Onlardan 19-u 600-dən yuxarı, 64-ü 500-600 arası bal toplayıb.
YAP Bərdə rayon təşkilatının sədri Fəqət Şadlinskaya çıxış edərək gəncləri tələbə adı qazanmaqları münasibətilə təbrik edib, Prezident İlham Əliyevin rəhbərliyi ilə ölkəmizdə həyata keçirilən dövlət təhsil siyasətindən, təhsilin maddi-texniki bazasının möhkəmləndirilməsindən, Birinci vitse-prezident Mehriban xanım Əliyevanın təhsilə diqqət və qayğısından danışıb.
Digər çıxış edənlər də tələbə adını qazanan gəncləri təbrik edib, onlara təhsildə və gələcək həyatda uğurlar arzulayıb, yüksək bilikli mütəxəssis kimi yetişməyi və Vətənə ləyaqətlə xidmət göstərməyi arzulayıblar.
Görüşdə qəbul imtahanlarında yüksək bal toplayan gənclər, onların müəllim və valideynləri çıxış edərək, ölkəmizdə təhsilin inkişafına göstərdiyi diqqət və qayğıya görə Prezident İlham Əliyevə və Birinci vitse-prezident Mehriban xanım Əliyevaya minnətdarlıqlarını bildiriblər. Tələbələr müəllim və valideynlərinin etimadını doğruldacaqlarına, bilik və elmlərə əzmlə yiyələnəcəklərinə söz veriblər.
Sonda yüksək balla ali məktəblərə qəbul olmuş tələbələrə YAP Bərdə rayon təşkilatının fəxri fərmanları, ulu öndər Heydər Əliyevin imzası olan döş nişanları və Qarabağ Regional Təhsil İdarəsinin qiymətli hədiyyələri təqdim olunub. Tədbir Bərdə şəhər 7 nömrəli və Xanqaraqoyunlu kənd tam orta məktəblərin şagirdlərinin hazırladıqları kompozisiya ilə başa çatıb.