Azərbaycan Respublikası Prezidentinin müdrik daxili və xarici siyasəti, ölkədə aparılan demokratik islahatlar nəticəsində dövlətimizin dünya birliyinə inteqrasiyası prosesi sürətlənmiş, o cümlədən hüquqi sahədə əməkdaşlığı genişlənmişdir.

        Cinayətkarlıqla mübarizədə dünya prokurorlarının səyini birləşdirmək və əməkdaşlığı genişləndirmək məqsədi ilə 1996-cı ildə BMT-nin qərarı ilə yaradılmış, 80-dən artıq ölkəni birləşdirən Beynəlxalq Prokurorlar Asossiasiyasına Azərbaycan 1997-ci ildən üzv qəbul edilmişdir.

        Ölkəmizdə aparılan məhkəmə-hüquq islahatının müsbət nəticələrinin beynəlxalq səviyyədə də etiraf olunmasının təzahürüdür ki, respublikamız bu nüfuzlu beynəlxalq təşkilatın rəhbər orqanı olan İcraiyyə Komitəsində təmsil olunmuş, baş prokurorun müavini vəzifəsində işləmiş Fikrət Məmmədov 1998-ci ildə Komitəyə üzv seçilmişdir.

        Cari ilin sentyabr ayının əvvəllərində Avstraliyanın Sidney şəhərində 70 dövlətin prokurorluq və digər hüquq-mühafizə orqanları rəhbərlərinin, bir çox nüfuzlu beynəlxalq təşkilatların nümayəndələrinin iştirakı ilə Beynəlxalq Prokurorlar Assosiasiyasının 6-cı İllik Konfransı və növbəti Ümumi Yığıncağı keçirilmişdir.

        Mütəşəkkil cinayətkarlıq və korrupsiya, pulların və narkotiklərin qanunsuz dövriyyəsi ilə mübarizə, ədalət mühakiməsinin səmərəliliyi, beynəlxalq hüquqi əməkdaşlıq və digər aktual məsələlərə həsr edilmiş tədbirdə Azərbaycanı ədliyyə naziri Fikrət Məmmədovun rəhbərlik etdiyi nümayəndə heyəti təmsil etmişdir.

        Azərbaycan ədliyyə nazirinin ədalət mühakiməsinin səmərəliliyinin artırılması barədə ingilis dilində məruzəsi Konfransın rəsmi materiallarına daxil edilərək dünya prokurorluq strukturları arasında yayılmışdır.

        Məruzədə möhtərəm Prezidentimiz cənab Heydər Əliyevin rəhbərliyi ilə həyata keçirilən məhkəmə-hüquq islahatı nəticəsində bir çox mütərəqqi qanunların qəbul edilməsi, ölkəmizin hüquq sistemində aparılmış köklü demokratik dəyişikliklər, insan hüquqlarının müdafiəsi sahəsində məhkəmələrin artan rolu, ədalət mühakiməsinin səmərəliliyinin yüksəldilməsi üsulları barədə məlumat verilərək, Azərbaycanın demokratik islahatlar yolunda inamla irəlilədiyi və bir sıra qabaqcıl dövlətlərin on illər boyu əldə etdikləri nailiyyətləri ölkəmizin qısa müddət ərzində qazandığı vurğulanmışdır. Həmçinin, konfrans iştirakçılarının diqqəti Azərbaycan ərazisinin 20 faizinin Ermənistan hərbi birləşmələri tərəfindən işğal edilməsinə, bir milyona qədər qaçqın və məcburi köçkünlərimizin problemlərinə cəlb edilmişdir.

Tədbirdə mühüm təşkilati məsələlərə də baxılmış, Assosiasiyanın rəhbər orqanına, İcraiyyə Komitəsinə seçkilər keçirilmişdir. Fərəhli haldır ki, Azərbaycan ədliyyə nazirinin Assosiasiyanın işində və digər beynəlxalq tədbirlərdə səmərəli iştirakı nəzərə alınaraq, o, üçüncü dəfə Komitəyə üzv seçilmiş, bununla da Azərbaycan MDB və ətraf region dövlətləri arasında bu təşkilatın rəhbər orqanında təmsil edilən yeganə ölkə olmuşdur.

Qabaqcıl dövlətlərin nümayəndələri ilə yanaşı respublikamızın da bu mötəbər beynəlxalq qurumun rəhbərliyində təmsil olunması hüquqi yardım göstərilməsində və ədalət mühakiməsinin həyata keçirilməsində dünyanın prokurorluq və digər hüquq-mühafizə strukturları ilə Azərbaycanın sıx əməkdaşlıq etmək  imkanlarını genişləndirmişdir.

Həmçinin, Azərbaycan prokurorluğunda və bütövlükdə ölkəmizdə həyata keçirilən məhkəmə-hüquq islahatının müsbət nəticəsi olaraq, müzakirələr zamanı təşkilatın İcraiyyə komitəsinin iclasının 2002-ci ildə Bakı şəhərində keçirilməsi qərara alınmışdır.

Səfər çərçivəsində yüksək məhkəmələrin fəaliyyəti ilə tanış olunmuş, təcrübə mübadiləsi aparılmış, bir sıra dövlətlərin prokurorluq və digər hüquq-mühafizə orqanlarının rəhbərləri, beynəlxalq təşkilatların nümayəndələri və digər rəsmi şəxslərlə faydalı görüşlər keçirilmiş, cinayətkarlıqla mübarizədə beynəlxalq əməkdaşlıqdan istifadə edilməsinin əhəmiyyəti vurğulanaraq bu sahədə işin perspektivləri müzakirə edilmişdir.