ELM VƏ TƏHSİL
Bilik Günü ərəfəsində Daşkəsəndə yeni məktəb və məktəbəqədər tərbiyə müəssisələri istifadəyə verilmişdir
Daşkəsən, 12 sentyabr (AZƏRTAC). Sentyabrın 12-də Daşkəsəndə əsl bilik bayramı əhval-ruhiyyəsi yaşanmışdır. Həmin gün rayonun pedaqoji kollektivləri, məktəblilər sevinc içərisində idilər. Rayon rəhbərliyi və qonaqlar bu sevincə qoşularaq Azərbaycan təhsilinin təntənəsinin şahidi olurdular. Həmin gün rayonda inşa edilmiş və əsaslı təmir olunmuş bir neçə yeni məktəb binasının, uşaq bağçasının açılış mərasimi olmuşdur.
AZƏRTAC xəbər verir ki, əvvəlcə Bayan kəndində inşası yenicə başa çatdırılmış orta məktəb binasının istifadəyə verilməsinə həsr edilmiş mərasim keçirilmişdir.
Mərasimdə çıxış edən Daşkəsən Rayon İcra Hakimiyyətinin başçısı Əhəd Abıyev bilik bayramı münasibətilə bütün rayon sakinlərini təbrik etmiş, digər sahələrdə olduğu kimi, təhsildə də qazanılmış uğurları diqqətə çatdırmışdır. Prezident İlham Əliyevin və Azərbaycanın birinci xanımı Mehriban Əliyevanın Azərbaycanda təhsilin inkişafı naminə həyata keçirdikləri tədbirlərdən söhbət açan natiq bildirmişdir ki, bütün bunların nəticəsində respublikanın hər yerində olduğu kimi, Daşkəsəndə də tədrisin keyfiyyəti ildən-ilə yüksəlmiş, onun maddi-texniki bazası daha da zənginləşmişdir. Məhz bu inkişafın nəticəsidir ki, son bir neçə ildə qazandıqları uğurlara görə rayonda 6 nəfər “Əməkdar müəllim” adına, 5 nəfər isə “Tərəqqi” medalına layiq görülmüşdür.
Diqqətə çatdırılmışdır ki, hazırda rayonda yeni məktəb binalarının inşası istiqamətində işlər sürətlə davam etdirilir. Bayan kəndində və Daşkəsən qəsəbəsində orta məktəb binalarının tikintisi başa çatdırılmış, Muşavaq, Əmirvar, Quşçu, Əmirvar-Əhmədli, Mollahəsənli kəndlərində yeni məktəb binalarının tikintisinə başlanılmışdır.
Bütün bunları ölkədə yaranan sabitliyin və sürətli inkişafın nəticəsi kimi qiymətləndirən mərasim iştirakçıları Azərbaycan Prezidentinə daşkəsənlilər adından minnətdarlıqlarını bildirmişlər.
Sonra rəmzi lent kəsilmiş, iştirakçılar məktəbdə yaradılmış şəraitlə yaxından tanış olmuşlar. Ümumilikdə 80 şagird yerlik məktəb binasında mövcud olan 2 fənn laboratoriyası, kitabxana, kompyuter otağı, idman zalı hamıda xoş təsir oyatmışdır.
Növbəti açılış mərasimi Daşkəsən qəsəbəsində keçirilmişdir. Burada da Təhsil Nazirliyinin vəsaiti ilə 80 şagird yerlik orta məktəb binası ən müasir tələblərə uyğun inşa edilərək istifadəyə verilmişdir. Məktəbdə tədrisin keyfiyyətini yüksəltmək üçün bütün şərait yaradılmışdır.
Çıxış edənlər bildirmişlər ki, uzun illər qəzalı vəziyyətdə olan köhnə məktəb binası valideynləri çox narahat edirdi. Nəhayət, dövlət qayğısı ilə qəsəbədə gözəl və yaraşıqlı məktəb binası inşa edilmişdir. Qəsəbənin sakinləri bütün bunlara görə dövlətimizin başçısı İlham Əliyevə və təhsilimizin inkişafı üçün əlindən gələni əsirgəməyən Heydər Əliyev Fondunun prezidenti Mehriban xanım Əliyevaya minnətdarlıqlarını bildirmişlər.
Həmin gün rayon mərkəzində Anar Mürsəlov adına 2 nömrəli orta məktəb əsaslı təmirdən sonra istifadəyə verilmişdir. Bu münasibətlə keçirilən mərasimdə rayon icra hakimiyyətinin başçısı Əhəd Abıyev, Təhsil Nazirliyinin nümayəndəsi Elxan Bəylərov, Yeni Azərbaycan Partiyası rayon təşkilatının sədri Meydanəli Yolçuyev, məktəbin direktoru Aybəniz Vəliyeva və başqaları çıxış edərək eyni vaxtda 460 şagirdin təhsil alması üçün nəzərdə tutulmuş bu məktəbin təmirində əməyi olanlara minnətdarlıqlarını bildirmişlər.
Sonra mərasim iştirakçıları məktəbdə aparılan təmir işlərinin keyfiyyəti ilə maraqlanmışlar. Burada tədbir iştirakçıları ümummilli liderimiz Heydər Əliyevin və Prezident İlham Əliyevin həyat və fəaliyyətlərindən bəhs edən stendə baxmışlar.
Həmin gün yaddaqalan hadisələrdən biri də rayondakı 2 nömrəli körpələr evi-uşaq bağçasının əsaslı təmirdən sonra açılışı olmuşdur. Rayon icra hakimiyyətinin dəstəyi ilə əsaslı şəkildə təmir edilmiş bağçada müasir standartlara cavab verən hər cür şərait yaradılmışdır. Uşaqlar mərasim iştirakçılarını salamladıqdan sonra Azərbaycanın dövlət himnini oxumuş, şeirlər söyləmiş, rayon icra hakimiyyətinin rəhbərləri ilə xatirə şəkli çəkdirmişlər.
Bütün gün davam edən “Bilik” bayramı daşkəsənlilərə unudulmaz anlar yaratmışdır.