Bakı, 17 iyun, AZƏRTAC

İyunun 17-də Azərbaycan Milli Olimpiya Komitəsində (MOK) birinci Avropa Oyunlarında medal qazanan idmançılarımızla ictimaiyyət nümayəndələrinin növbəti görüşü təşkil edilib.

AZƏRTAC xəbər verir ki, görüşdə Azərbaycan idmançılarının birinci Avropa Oyunlarında qazandıqları parlaq qələbələrdən bəhs edən görüntülər nümayiş olunub.

MOK-un vitse-prezidenti Çingiz Hüseynzadə məlumat verib ki, yarışların beşinci günündə 21 dəst medalın sahibi müəyyənləşib. Hesabına 3 medal əlavə edən Azərbaycan yığmasının aktivindəki medalların sayı 19-a çatıb. Aktivində 8 qızıl, 3 gümüş və 8 bürünc medal olan yığmamız həm qeyri-rəsmi komanda hesabında, həm də ümumi medal sayında ikinci pillədə qərarlaşıb. “Biz inanırıq ki, idmançılarımız sonrakı günlərdə də qələbələr qazanacaqlar və burada onlarla bir yerdə qələbə sevincini bölüşəcəyik. Zəfər günlərimiz hələ qabaqdadır. Mən sizin hamınızı qələbə münasibətilə təbrik edirəm və idmançılarımıza uğurlar arzulayıram”, - deyə Ç.Hüseynzadə bildirib.

Gənclər və idman naziri Azad Rəhimov çıxış edərək deyib: “Birinci Avropa Oyunlarında idmançılarımızın qələbələri bizi çox sevindirir. Bununla yanaşı, Azərbaycan Prezidentinin Avropa Olimpiya Komitəsinin prezidenti Patrik Hikkini “Şərəf” ordeni ilə təltif etməsi də bizi xeyli məmnun etdi. Bu, ölkəmizə göstərilən yüksək etimada verilən qiymətdir.

Nazir iyunun 17-nin Azərbaycanda səhiyyə işçilərinin peşə bayramı olduğunu vurğulayaraq, onların yarışların başladığı ilk gündən yüksək peşəkarlıq göstərdiklərini qeyd edib.

Görüşdə iştirak edən təhsil naziri Mikayıl Cabbarov isə idmançılarımızın parlaq qələbələri ilə hər bir azərbaycanlıda qürur hissi yaşatdıqlarını bildirib və qalibləri təbrik edib.

Sonra medal qazanan idmançılarımıza MOK-un xüsusi hədiyyələri təqdim olunub.

“Bakı-2015” birinci Avropa Oyunlarında qadınlar arasında güləş yarışlarının ikinci günündə qızıl medal qazanan Anjela Doroqan deyib: “Qələbə sevincini sözlə ifadə etmək çox çətindir. Çünki bu, idman karyeramda qazandığım ilk qızıl medaldır. Azərbaycanda keçirilən birinci Avropa Oyunlarında tarix yazmağı bacardım. Mənə göstərilən etimadı doğrultdum və bayrağımızı ucaltdım”.

Avarçəkmə yarışlarında gümüş medal qazanan Valentin Demyanenko isə finaldakı çıxışının uğurlu alınmadığını vurğulayaraq deyib: “Qızıl medal üçün qalibdən 0,078 saniyə geri qaldım. Bu yarışın qalibi olan 20 yaşlı latviyalı Henrikas Yustautas güclü idmançıdır. Ümid edirəm ki, gələcəkdə ona yenə də rəqib olacağam.”

MOK-un iyunun 14-dən start verdiyi “Zəfər günləri” adlı xüsusi tədbir ayın 29-dək davam edəcək.