Britaniya aviadaşıyıcısı Cənubi Koreya sahillərində təlim keçirib
Bakı, 9 sentyabr, AZƏRTAC
Böyük Britaniyanın Hərbi Dəniz Qüvvələrinə məxsus “Prince of Wales” aviadaşıyıcısı Cənubi Koreyanın Busan şəhərinin cənubunda yerləşən beynəlxalq sularda hərbi təlim keçirib.
AZƏRTAC xəbər verir ki, Yonhap agentliyi bu barədə Birləşmiş Krallığın Koreya Respublikasındakı səfirliyinə istinadla məlumat yayıb.
Təlimlər zamanı F-35B tipli qırıcı təyyarələrdən istifadə edilməklə hava qüvvələrinin imkanları nümayiş olunub.
Böyük Britaniyanın Cənubi Koreyadakı səfirinin sözlərinə görə, təlimlər Londonun Seulla əməkdaşlıq səviyyəsini, həmçinin strateji tərəfdaşlığı dərinləşdirmək və regionun təhlükəsizlik arxitekturasına töhfə vermək əzmini göstərir.
Aviadaşıyıcının heyəti təxminən 700 nəfərdən ibarətdir. Ümumilikdə isə gəmidə 1600-dək hərbçi və 24 ədəd F-35B döyüş təyyarəsi yerləşdirilə bilər.
Bundan əlavə, Koreya Respublikası və Böyük Britaniya üç gəmi ilə hərbi manevrlər həyata keçiriblər. Manevrlərin məqsədi iki ölkənin Hərbi Dəniz Qüvvələri arasında qarşılıqlı fəaliyyətin səviyyəsini artırmaq olub.
Qeyd edək ki, 2025-ci ilin avqust ayının ortalarında Böyük Britaniya Hərbi Dəniz Qüvvələrinə məxsus iki gəmi Busan limanına gəlib.
Bölmənin digər xəbərləri
