Bu gün Leypsiq naşirlər, yazıçılar və oxucular üçün “müqəddəs” məkandır
Berlin, 15 mart, AZƏRTAC
Əsası XVII əsrdə qoyulmuş Leypsiq kitab yarmarkası öz əhəmiyyətinə görə Frankfurt yarmarkasından sonra Almaniyada ikinci yeri tutur. Bu gün Leypsiq yarmarkası deyəndə 100 min kitab, 20 min yeni nəşr, nüfuzlu mükafat, tanınmış müəlliflər və ümidverici debütantlar təsəvvürə gəlir. Eksponentlərin sayına görə rekord vuran Leypsiq beynəlxalq kitab yarmarkasında 48 ölkədən 2600 naşir iştirak edir. Builki yarmarkaya dörd gün ərzində (martın 15-dən 18-dək) 250 mindən çox insan gələcəyi gözlənilir.
Yarmarkada ən müxtəlif janrlara aid ədəbiyyatla yanaşı məktəb dərslikləri, qəzet və jurnallar, təqvimlər, bədii albomlar, audiokitablar da təqdim ediləcək. Adətən bu kitab yarmarkası “Leypsiq qiraətləri” adlı bahar ədəbiyyat festivalı ilə müşayiət olunur. Budəfəki festivalın proqramında klassik qiraətlərdən başlamış qeyri-rəsmi konsertlərə qədər geniş spektrli 3600 tədbir nəzərdə tutulub.
Festival hər il on minlərlə bədii söz sərrafını cəlb edir. Bundan əlavə, Leypsiqdə Manga-Comic-Con (MCC) komiks fanatlarının növbəti toplantısı keçiriləcək.
Leypsiq kitab yarmarkasında ənənəvi Şərqi Avropa Ədəbiyyatı daha geniş təmsil olunub. 2018-ci ildə Rumıniya bu yarmarkanın fəxri qonağıdır. Rumıniyadan olan 50-yə yaxın yazıçı, şair, publisist, illüstrasiyaçı rəssam özlərinin yeni işlərini təqdim edəcək və müasir Rumıniyada aktual sosial-siyasi vəziyyət, bu ölkənin tarixi və mədəniyyəti barədə diskussiyalarda iştirak edəcəklər. 2009-cu ildə ədəbiyyat üzrə Nobel mükafatı laureatı olmuş Gerta Müller yarmarkada öz fikirlərini bölüşəcək. Etnik alman olan bu yazıçı və şairə Rumıniyada doğulub, 1987-ci ildə isə AFR-ə köçüb.
Leypsiq kitab yarmarkasının mükafatının təqdim edilməsi bu sahəvi forumun ənənəvi mühüm tərkib hissəsidir.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
