Cənubi Koreya XİN başçısı Vaşinqtonda KXDR məsələsini müzakirə edəcək
Bakı, 11 mart, AZƏRTAC
Koreya Respublikasının xarici işlər naziri xanım Kan Kyun-hva gələn həftə Vaşinqtonda ABŞ dövlət katibi Reks Tillersonla Koreya Xalq Demokratik Respublikası (KXDR) ilə bağlı vəziyyəti müzakirə edəcək.
AZƏRTAC xəbər verir ki, Cənubi Koreya XİN başçısı xanım Kan Kyun-hva jurnalistlərə açıqlamasında görüşdə KXDR-in nüvə silahsızlaşdırılması məsələsi, bu istiqamətdə Şimali Koreya lideri Kim Çen Inın ABŞ Prezidenti Donald Trampla nəzərdə tutulan görüşü barədə müzakirələrin aparılacağını deyib.
“Hər iki tərəf dialoqa hazır olduğunu təsdiqləyib. İndi qarşıda işçi səviyyədə sammitin gündəliyinin hazırlanması məsələsi durur”,- deyən Kan Kyun-hva əlavə edib ki, maraqlı tərəflər arasında yaxın məsləhətləşmələr çox vacibdir.
Cənubi Koreya XİN başçısı bildirib ki, rəsmi Seul bu məsələdə irəliləyişin əldə olunması üçün bütün səylərini göstərir.
Bölmənin digər xəbərləri
