CƏNUBİ QAFQAZ VƏ ONUN ƏNƏNƏLƏRİ AVROPANI MARAQLANDIRIR
AZƏRTAC xəbər verir ki, Amsterdam Universitetində “Cənubi Qafqaz və onun ənənələri” mövzusunda konfrans keçirilmişdir.
Qafqaz regionu, onun tarixi və mədəniyyəti ilə tanışlıq məqsədi daşıyan konfransda Hollandiyanın tanınmış qafqazşünasları, Avropa İttifaqının Tbilisidəki ofisinin əməkdaşı Oliver Reysner, Amsterdam Universitetinin professoru Fransuaza Kommanyon Qafqaz xalqlarının mədəniyyət, tarix və din problemləri mövzusunda geniş məruzələr etmişlər.
Azərbaycanlı məruzəçilər - Leydendəki Webster Universitetinin magistrantı Məryəm Əliyevanın “Azərbaycan sivilizasiyaların qovuşuğunda” və Azərbaycan Dövlət Neft Şirkətinin birinci vitse-prezidentinin müşaviri, texnika elmləri doktoru, professor Eldar Şahbazovun “Azərbaycanın neft strategiyası” mövzularında məruzələri böyük maraqla qarşılanmışdır.
Konfrans iştirakçılarının sözlərinə görə, hər iki çıxış Azərbaycanın təkcə tarixinin və bu gününün geniş panoramını deyil, həm də ölkəmizin gözəl gələcəyini, dinamik inkişafını, sivilizasiyaların dialoqu üçün nümunə ola biləcək nadir tolerantlıq təcrübəsini nümayiş etdirmişdir.
Erməni iştirakçıların qondarma məsələlər ətrafında diskussiya aparmaq və bununla da auditoriyanın diqqətini Azərbaycanın əldə etdiyi nailiyyətlərdən yayındırmaq cəhdlərinə baxmayaraq, konfrans iştirakçıları həmvətənlərimizin çıxışlarına böyük maraq göstərmiş, onlara çoxsaylı suallar vermişlər.
Konfransın işində diplomatik nümayəndəliklərin təmsilçiləri, Hollandiya universitetlərinin professor və tələbələri, Qafqazla maraqlanan mütəxəssislər iştirak edirdilər.
Konfrans materiallarının dərc edilməsi və Cənubi Qafqaza həsr olunmuş tədbirlərin hər hər il keçirilməsi qərara alınmışdır.
Bölmənin digər xəbərləri
