Praqa, 9 yanvar (AZƏRTAC). Keçən il ərzində Çexiya Respublikası polisinin kadr heyəti təqribən 2200 nəfər azaldılmışdır. Hazırda asayiş keşikçilərinin sayı 39. 037 nəfərdir. Bu statistik məlumatlar Polis Rəyasət Heyətinin mətbuat katibi Veronika Qodaçova tərəfindən elan edilmişdir. Mütəxəssislərin hesablamalarına görə, Çexiyada asayişin təmin edilməsi üçün lazım olan polis işçilərinin optimal sayı 40.309 nəfərdir. Lakin vəsaitə qənaət etmək məcburiyyəti üzündən polisə yeni işçilər qəbul edilməsi dayandırılmışdır. Polis prezidentinin fikrincə, indiki 39 minlik hədd kritik göstəricidir. Daxili işlər naziri Yan Kubitse bu yaxınlarda vəd etmişdir ki, polislərin işə qəbulu, məhdud miqdarda da olsa, bərpa olunacaqdır. Burada ilk növbədə kriminal şəraitin pisləşməkdə olduğu ucqar regionlardan söhbət gedir.

Çexiya KİV-ləri istehza ilə qeyd edirlər ki, Çexiya vətəndaşları tərəfindən yaradılan tullantıların miqdarı ilbəil artır. Statistik məlumata görə, 2010-cu ildə kommunal tullantıların həcmi 16 faiz artmışdır. 2009-cu ildə Çexiya ailələri tərəfindən konteynerlərə atılmış zibilin miqdarı 5,36 milyon ton və ya ölkənin hər vətəndaşı üçün orta hesabla 510 kiloqram olmuşdur. Bununla bərabər, bir müsbət fakt da diqqəti cəlb edir: Çexiya vətəndaşları tullantıları daha diqqətlə çeşidləməyə tədricən adət edirlər. Bu, Avropa İttifaqının tələbidir. Beləliklə, 2010-cu ildə qarışıq tullantılar üçün konteynerlərə Çexiyanın hər vətəndaşı tərəfindən orta hesabla 300 kiloqram zibil atılmışdır.

Ölkədə çeşidlərə ayrılmış tullantılardan təkrar istifadə dərəcəsi də artır. Aİ üzvü olan ölkələrin vətəndaşları arasında ətraf mühiti ən az zibilləyən Çexiya əhalisidir. Bu, Çexiya vətəndaşlarının alıcılıq qabiliyyəti, istehlakçıların davranışı, habelə evlərin və mənzillərin təchizatının dəyişdirilmə sürəti ilə birbaşa bağlıdır.

Pərvanə Qarayeva

AZƏRTAC xüsusi müxbiri

Praqa