ÇİKAQODA İPƏK YOLU ÖLKƏLƏRİNƏ HƏSR OLUNMUŞ KONFRANS KEÇİRİLMİŞDİR
AZƏRTAC xəbər verir ki, Çikaqoda “Biznes yeni İpək yolunun potensialıdır” mövzusunda konfrans keçirilmişdir. Tədbir İllion Orta Asiyanın Tədqiqi Mərkəzi, Çikaqo Universitetinin pakistanlı məzunlar klubu, habelə Türkiyə və Pakistanın Çikaqodakı ticarət nümayəndəlikləri tərəfindən təşkil olunmuşdur. Müzakirələrdə Azərbaycanın Los-Ancelesdəki baş konsulu Elin Süleymanov, Orta Asiya üzrə Tədqiqat Mərkəzinin rəhbəri, Naxçıvan Dövlət Universitetinin fəxri doktoru Harri Lepinski, Türkiyənin və Pakistanın Çikaqodakı baş konsulları Kənan İpək və Aman Rəşid, Hindistan və Qazaxıstan təmsilçiləri iştirak etmişlər.
Elin Süleymanov çıxışında bildirmişdir ki, əsası ümummilli lider Heydər Əliyev tərəfindən qoyulan uzunmüddətli strategiyanın həyata keçirilməsi Azərbaycanın İpək yolu infrastrukturunda əsas rolunu möhkəmləndirmişdir. Xüsusi qeyd olunmuşdur ki, Azərbaycan öz siyasətində bütövlükdə regionun mənafelərinə əsaslanır və bütün ölkələrlə qarşılıqlı faydalı tərəfdaşlıq münasibətlərinin qurulmasına səy göstərir.
Türkiyənin baş konsulu Kənan İpək ölkəsinin region dövlətləri ilə uğurlu əməkdaşlığından danışaraq təəssüflə xatırlatmışdır ki, Ermənistan hakimiyyətinin qeyri-konstruktiv mövqeyi bu ölkənin özünütəcridini dərinləşdirir. O, Ermənistanı silahlı birləşmələrini Azərbaycanın işğal olunmuş ərazilərindən çıxarmağa çağırmışdır.
Pakistanın Çikaqodakı ticarət attaşesi Əsəd Xayauddin konfransa yekun vuraraq Xəzər regionunun strateji potensialından danışmış və Azərbaycanın İpək yolunun sərmayə baxımından ən cəlbedici ölkəsi olduğunu vurğulamışdır. Xatırladaq ki, Fletçer Ali Diplomatiya və Hüquq məktəbini bitirmiş Ə.Xayauddin Xəzər regionu mövzusunda dissertasiya müdafiə etmişdir.
Bölmənin digər xəbərləri
