ÇİN VƏ YAPONİYA MÜBAHİSƏLİ QAZI BİRLİKDƏ HASİL ETMƏYİ QƏRARA ALMIŞLAR
AZƏRTAC xəbər verir ki, Çin və Yaponiya Çunsyao qaz yatağının (yaponlar həmin yatağı Sirakaba adlandırırlar) birlikdə işlənilməsi haqqında saziş imzalamışlar. Bu yataq Şərqi Çin dənizində mübahisəli ərazidə yerləşir. Beləliklə, Çin və Yaponiya iki ölkə arasında münasibətləri xeyli mürəkkəbləşdirmiş çoxillik mübahisəni həll etmişlər.
Çin 2003-cü ildə Çunsyao yatağının işlənilməsinə başlayarkən bildirmişdi ki, o, Çinin ərazi sularında yerləşir. Lakin Yaponiya bununla razılaşmayıb, yatağın özününkü olduğunu elan etmişdi.
Çunsyaoda sübut edilmiş qaz ehtiyatları neft ekvivalentində təqribən 92 milyon barreldir. Bu həcmdə neft Yaponiya energetikasının yalnız üç həftə tam səmərəli işləməsinə çatacaqdır. Lakin Çin də, Yaponiya da yatağın yaxınlığında əlavə karbohidrogen ehtiyatları aşkar etmək ümidindədirlər.
Şərqi Çin dənizinin mübahisəli ərazi sularında daha üç karbohidrogen yatağı yerləşir. Qeyri-rəsmi məlumata görə, Çin və Yaponiya onlardan birinin birlikdə işlənilməsi haqqında da razılığa gələ bilmişlər.
Bölmənin digər xəbərləri
