DAŞKƏNDDƏ DOSTLUQ GECƏSİ
Azərbaycan mədəniyyət mərkəzi Daşkənddəki Millətlər sarayında “Svetlisa poleka” Polşa mədəniyyət mərkəzi ilə birgə “Özbəkistan bizim ümumi evimizdir” adlı musiqili ədəbi-bədii kecə keçirmişdir. Özbəkistanın müstəqilliyinin on birinci ildönümü münasibətilə təşkil olunmuş tədbirdə Daşkənddəki Belorus, Yunan, Koreya, Alman, Türk mədəniyyət mərkəzlərinin rəhbərləri, Azərbaycan diasporunun üzvləri iştirak etmişlər.
Gecədə Beynəlmiləl Mədəniyyət Mərkəzinin sədri Kərim Rəsulov, Azərbaycan mədəniyyət mərkəzinin sədri İsmayıl Məmmədov, Polşa mədəniyyət mərkəzinin sədri İrena Tağıyeva və başqaları çıxış edərək Özbəkistanda azsaylı xalqlara yaradılan şəraitdən söhbət açmış, ölkədə yaşayan xalqların dostluq əlaqələrindən danışmışlar.
Sonra “Mehrcon” Azərbaycan uşaq rəqs ansamblı çıxış etmiş, müğənni Zeynəb Kərimova xalq mahnı və təsniflərimizi ifa etmiş, digər xalqların mahnılari səslənmişdir.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
