Bakı, 13 sentyabr, AZƏRTAC

Son zamanlar Ermənistanın Azərbaycana qarşı təxribatçı hərəkətlərinin sayı artmaqda davam edir. Ermənistan rəhbərliyi hər zaman Azərbaycan dövlətinə qarşı yalan, qərəzli, təxribat xarakterli kampaniya aparır, dünya ictimaiyyətində ölkəmizə qarşı mənfi münasibət formalaşdırmağa çalışır. Ermənilər özlərini yazıq, məzlum, Azərbaycan dövlətini isə işğalçı kimi qələmə verməyə çalışırlar. Otuz il torpaqlarımızı işğal altında saxlayan Ermənistanın işğalçı dövlət olması Prezident İlham Əliyevin müdrik siyasəti və uzaqgörən diplomatiyası sayəsində bütün dünyaya məlum oldu.

Bu fikirləri AZƏRTAC-a açıqlamasında Milli Məclisin deputatı, professor Kamilə Əliyeva səsləndirib.

O diqqətə çatdırıb ki, 2020-ci ildə Azərbaycanın hərbi-siyasi yolla öz ərazi bütövlüyünü bərpa etməsi beynəlxalq təşkilatlar tərəfindən dəstəkləndi. Bu gün də Ermənistan öz ikiüzlü və riyakar siyasətindən əl çəkmir. Azərbaycan dövlətinin “Laçın” dövlət sərhədindən buraxılış məntəqəsini təsis etdikdən sonra Xankəndi və ətraf ərazilərdə yaşayan ermənilərin guya aclıqla, humanitar fəlakətlə üzləşməsi barədə Ermənistan bütün beynəlxalq təşkilatlara məktublar ünvanlamağa başladı. Ermənilərin bu yalan və iftiraları fiaskoya uğradı. Əvvəl Beynəlxalq Ədalət Məhkəməsində, sonra isə BMT Təhlükəsizlik Şurasında (BMT TŞ) Ermənistanın bu iddiaları qəbul edilmədi. Beynəlxalq təşkilatlar Azərbaycanın həyata keçirdiyi siyasətin beynəlxalq hüququn normalarına uyğun olduğunu vurğuladılar. Ermənistan və onun havadarları ağır məğlubiyyətə düçar oldular.

Ermənistanın Azərbaycanla sülh sazişini imzalamamaq üçün bütün çirkin və qanunazidd əməllərə əl atdığını deyən deputat bildirib: “Azərbaycanın Qarabağ bölgəsində Ermənistanın dəstəklədiyi qondarma rejimin sentyabrın 9-da "prezident seçki”ləri adı altında apardığı qanunsuz fəaliyyəti Azərbaycan Konstitusiyasının, qanunlarının, həmçinin beynəlxalq hüququn norma və prinsiplərinin kobud şəkildə pozulmasıdır. Ermənistan tərəfindən ərazilərimizdə yaradılmış qondarma rejimin ölkəmizin ərazi bütövlüyünə və suverenliyinə qarşı artan təxribatları, beynəlxalq səviyyədə Azərbaycanın ərazisi kimi tanınan Qarabağdan hələ də erməni silahlı qüvvələrinin çıxarılmaması bölgədə sülhün və təhlükəsizliyin yaranmasına təhdiddir”.

Onun sözlərinə görə, son dövrlər Ermənistanın keçmiş hərbçiləri uzunmüddətli hərbi təlimlərə cəlb etməsi, xarici dövlətlərdən hücum təyinatlı silahlar alması, bu silahları Qarabağ və Naxçıvanla şərti sərhəddə cəmləşdirməsi bu ölkənin müharibəyə rəvac verən hərəkətləridir. Ermənistanın baş naziri Nikol Paşinyan Qərbdəki bəzi ölkələrin sifarişi ilə hərəkət edir. Paşinyan ağıllı siyasətçi olsaydı başa düşərdi ki, Azərbaycanla mehriban qonşuluq siyasəti yürütsə, ölkəsini iqtisadi cəhətdən inkişaf etmiş dövlətə çevirə bilər. Azərbaycanla müharibə, təhdid dili ilə danışmaq bu ölkəni məhvə aparır. Çünki bu gün Azərbaycan dünyada kifayət qədər nüfuza sahib bir dövlətdir.

“Ümid edirəm ki, beynəlxalq təşkilatlar Ermənistanın və qondarma rejimin bu qanunazidd əməllərinə qarşı çıxacaq. Əks təqdirdə, Azərbaycan öz ərazi bütövlüyü və suverenliyinə zidd olan bu əməllərə qarşı bütün lazımi tədbirləri həyata keçirəcək”, - deyə K.Əliyeva əlavə edib.