DƏYİRMİ MASA-SEMİNAR İŞİNİ DAVAM ETDİRİR
Xəbər verdiyimiz kimi, avqustun 27-də Bakıda, “Həyat-Recensi Naxçıvan” mehmanxanasında “Yeni cinayət prosedurlarında konstitusiya hüquqlarının təmin edilməsi” mövzusunda dəyirmi masa-seminar öz işinə başlamışdır. Seminar Azərbaycan Respublikasının Konstitusiya Məhkəməsi, ABŞ-ın Dövlət Departamenti, Ədliyyə Nazirliyi və Hüquqşünaslar Assosiasiyası tərəfindən təşkil olunmuşdur.
Avqustun 28-də seminar “Yeni məhkəmə prosedurları və şübhəli sayılan şəxslərin və şahidlərin hüquqlarının təmin edilməsi” mövzusu ilə davam etdirilmişdir. İclasa Azərbaycan Konstitusiya Məhkəməsinin hakimi Eldar Məmmədov sədrlik edirdi.
Seminarda Azərbaycan Baş prokurorluğunun qanunvericilik şöbəsinin müdiri Azər Cəfərovun “Müxtəlif istintaq əməliyyatları zamanı şübhəli sayılan və ittiham olunan şəxslərin hüquqlarının təmin edilməsi”, Nizami rayon məhkəməsinin sədri Tamilla Nəsrullayevanın “Həbs və alternativ fövqəladə qəti imkan tədbirləri zamanı şübhəli sayılan və ittiham olunan şəxslərin hüquqlarının təmin edilməsi”, Vəkillər Kollegiyası idarə heyətinin sədri Azər Tağıyevin “Şübhəli sayılan və ittiham olunan şəxslərin hüquqlarının cinayət təqibindən qorunması” mövzusunda məruzələri dinlənildi. Ağır Cinayətlərə Dair İşlər üzrə Məhkəmənin sədri Mahmud Nəbiyev “İlkin instansiya məhkəmələrində icraatın gedişində ittiham edilən şəxslərin hüquqlarının təmin olunması”, Ali Məhkəmənin hakimi Rafiq Məmmədov isə “Məhkum olunmuş şəxslərin yuxarı məhkəməyə təkrar müraciət etmək hüququnun təmin edilməsi” mövzusunda məruzə etdilər.
Kiçik fasilədən sonra məruzələr müzakirə olundu və tədbirin ikinci gününə yekun vuruldu.
Avqustun 29-da dəyirmi masa-seminar işini davam etdirəcəkdir.
Bölmənin digər xəbərləri
