DÖVLƏT ƏMLAKININ SƏMƏRƏLİ İSTİFADƏSİNƏ NƏZARƏTLƏ BAĞLI XÜSUSİ HESABAT FORMASI TƏSDİQ EDİLMİŞDİR
Dövlət Əmlakının İdarə Edilməsi üzrə Dövlət Komitəsindən (DƏİEDK) AZƏRTAC-a bildirmişlər ki, qurum tərəfindən dövlət müəssisələrinin idarə edilməsi və dövlət əmlakından istifadə mexanizmlərinin təkmilləşdirilməsi, dövlət əmlakının səmərəli istifadə edilməsi və onun qorunub saxlanılması, bu sahədə dövlət nəzarətinin gücləndirilməsi və şəffaflığın artırılması istiqamətində zəruri tədbirlər görülməkdədir.
Bu baxımdan Nazirlər Kabinetinin 2008-ci il 23 aprel tarixli qərarı ilə təsdiq edilmiş “Dövlət əmlakının qorunub saxlanılması və ondan istifadə vəziyyəti haqqında illik xüsusi hesabat forması” dövlət müəssisə və təşkilatlarında dövlət əmlakından səmərəli istifadənin təmin olunmasında böyük əhəmiyyət kəsb edir.
Qərara əsasən “Dövlət əmlakının qorunub saxlanılması və ondan istifadə vəziyyəti haqqında illik xüsusi hesabat forması” yerli icra hakimiyyəti orqanları, dövlət komitə, şirkət, birlik, səhmdar cəmiyyətləri və dövlət şirkətləri tərəfindən hər il aprelin 1-dək əvvəlki hesabat ili üçün DƏİEDK-ya təqdim edilməlidir. Xüsusi hesabat formasının alınmasında əsas məqsəd dövlət əmlakının istifadə vəziyyətinin təhlili, faktiki vəziyyətinin müəyyən edilməsi, onun qorunub saxlanılması və səmərəli istifadəsi, habelə bu sahədə nəzarətin gücləndirilməsinin təmin olunmasıdır.
Xüsusi hesabat formasında müəssisənin maliyyə göstəriciləri, balans aktivləri və öhdəlikləri, torpaq tikili və avadanlığı, daşınmaz əmlakın mövcudluğu, daşınar və daşınmaz əmlakdan istifadə vəziyyəti haqqında məlumatlar əks olunmuşdur. Xüsusi hesabat forması dövlət müəssisələri və orqanları tərəfindən DƏİEDK-nə təqdim edildikdən sonra hər biri təhlil olunaraq vahid informasiya bazasına daxil ediləcəkdir.
Dövlət əmlakının qorunub saxlanılmasına və ondan səmərəli istifadə olunmasına nəzarət məqsədi ilə hesabatlarda göstərilən məlumatların araşdırılması üçün ehtiyac olduqda komitə tərəfindən həmin müəssisələrdə monitorinqlər keçiriləcəkdir. Monitorinqlərin nəticəsi barədə Azərbaycan Respublikasının Prezidentinə və Nazirlər Kabinetinə, habelə zəruri hallarda müvafiq dövlət orqanlarına məlumat veriləcəkdir.
Komitə hesabat formasının doldurulması və təqdim edilməsi qaydaları ilə bağlı metodik təlimat hazırlamışdır. Xüsusi hesabat formasının blanklarının çap edilməsi və metodik təlimatla birgə yerlərə çatdırılması DƏİEDK tərəfindən təşkil olunacaqdır.
Bakı şəhərində və regionlarda yerləşən dövlət müəssisələri və orqanlarının, komitənin ərazi şöbələrinin işçiləri üçün hesabat formasının doldurulması və tətbiq olunması ilə bağlı seminarlar təşkil ediləcəkdir.
Xüsusi hesabat formasının alınması nəticəsində dövlət müəssisələrində və nizamnamə kapitalında dövlətin payı olan səhmdar cəmiyyətlərində dövlət əmlakının qorunub saxlanılması və ondan səmərəli istifadə olunmasına nəzarətin daha təkmilləşdirilmiş formada həyata keçirilməsi təmin ediləcəkdir.
Bölmənin digər xəbərləri
