Bakı, 18 mart (AZƏRTAC). Azərbaycan Respublikasının Prezidenti yanında Dövlət Qulluğu Məsələləri üzrə Komissiyanın (DQMK) Aparat rəhbəri Vilayət Hüseynovun rəhbərlik etdiyi dövlət qulluqçularından ibarət nümayəndə heyəti Türkiyə Respublikasına səfər etmişdir.

DQMK-dan AZƏRTAC-a bildirmişlər ki, səfər “Azərbaycan Respublikasının Prezidenti yanında Dövlət Qulluğu Məsələləri üzrə Komissiya və Türkiyə Respublikasının Dövlət Kadrlar İdarəsi arasında 2012-2013-cü illər üçün əməkdaşlıq üzrə Fəaliyyət Planı”na əsasən həyata keçirilmişdir.

Nümayəndə heyətinin tərkibinə DQMK-nın, Hesablama Palatasının, Gənclər və İdman Nazirliyinin, Ədliyyə Nazirliyinin və Dövlət Sosial Müdafiə Fondunun nümayəndələri daxil idi.

Səfərin məqsədi iki ölkə arasında dövlət qulluğu sahəsində dəstək və təcrübə mübadiləsinin aparılması, idarəçiliyin təkmilləşdirilməsi olmuşdur.

Səfərin ilk günü azərbaycanlı dövlət qulluqçuları Türkiyənin qurucusu Mustafa Kamal Atatürkün məzarını ziyarət etmiş və böyük öndərin xatirəsini yad etmişlər.

Səfər çərçivəsində nümayəndə heyəti Türkiyənin Dövlət Kadrlar İdarəsinin rəhbəri Mehmet Ali Kumbuzoğlu ilə görüşmüşdür.

Görüşdə iki qardaş ölkə arasında dövlət qulluğu sahəsində əməkdaşlığın yüksək səviyyədə olduğu bildirilmişdir. Vurğulanmışdır ki, təcrübə mübadiləsinin aparılması məqsədi ilə təşkil olunan qarşılıqlı səfərlər əlaqələrin daha da dərinləşməsinə xidmət edəcəkdir.

Səfər zamanı azərbaycanlı dövlət qulluqçularına Türkiyənin dövlət idarəetmə və dövlət qulluğu sisteminin, həmçinin bu ölkənin Dövlət Kadrlar İdarəsinin, Sosial Güvənlik Nazirliyinin, Gənclər və İdman Nazirliyinin, Ədliyyə Nazirliyinin və Sayıştayın (Hesablama Palatası) fəaliyyəti ilə bağlı təqdimatlar edilmişdir.

Səfər çərçivəsində Azərbaycan nümayəndə heyətinin üzvləri təmsil etdikləri dövlət orqanlarına uyğun olan dövlət qurumlarında olmuş və onların fəaliyyəti ilə bilavasitə yerində tanış olmuşlar.

Səfərin sonuncu günündə nümayəndə heyətimiz Türkiyənin Nevşəhər vilayətinə səfər etmişdir. Səfər zamanı nümayəndə heyətinin üzvləri Nevşəhər Valiliyinin fəaliyyəti, həmçinin vilayətin zəngin mədəniyyəti və tarixi ilə tanış olmuşlar.