DÖVLƏTQAÇQINKOMUN MƏTBUAT XİDMƏTİNİN BƏYANATI
“Hürriyyət” qəzetinin 2002-ci il 31 mart tarixli, 64-cü nömrəsində “Məcburi Köçkünlərin Forumu” adlı qondarma bir tədbirin keçirilməsi və guya məcburi köçkünlər tərəfindən Azərbaycan hakimiyyətinə müraciət olunması barədə dərc olunmuş yazı ilə əlaqədar Dövlətqaçqınkomun mətbuat xidməti bildirir:
Son zamanlar ölkədə gərgin zəhmət, ağır sınaqlar bahasına yaradılmış siyasi sabitliyi pozmağa cəhd göstərməklə Azərbaycanın beynəlxalq aləmdə qazandığı uğurları həzm edə bilməyən müxalif qüvvələrin, habelə şəxsi maraqlarını ölkənin və xalqın maraqlarından üstün tutanların bu cür yazıları, təbii ki, geniş ictimaiyyətlə yanaşı, məcburi köçkünlər tərəfindən də hiddətlə qarşılanmışdır.
Bir neçə qohum-əqrabasını, vəzifə düşgünlərini, özünə “siyasətçi” imici formalaşdırmağa çalışan diletantları ətrafında toplayan müxalif qüvvələr xalqın və dövlətin mənafeyinə zidd olan məkrli siyasətlərinin uğursuzluqla nəticələndiyinə əmin olduqlarını biləndən sonra xalqımızın ən həssas təbəqəsi olan qaçqın və məcburi köçkünlərin hissiyatı ilə oynamağa, daha doğrusu, alver etməyə başlayıblar. Lakin onlar bir şeydə yanılırlar ki, 10 il çadır şəhərciklərində, vaqonlarda, daxmalarda dözülməz həyat şəraitində yaşayan insanların iradəsinə özlərinin bu cür ucuz və sensasiyalı təbliğatları ilə təsir göstərə bilməyəcəklər. Onlar müxtəlif tədbirlərdə yenə də köçkünlərin adından danışmaqla, özlərini Dağlıq Qarabağ probleminin həllinin “bilicisi”, qaçqın və məcburi köçkünlərin doğma ocaqlarına qaytarılmalarının “münəccimləri” rolunda təqdim etməyə çalışırlar. Onlar həmişə olduğu kimi, fevral-mart mitinqlərində də qaçqın və məcburi köçkün soydaşlarımızı özlərinin siyasi oyunlarına qoşulmağa təhrik etsələr də, buna nail ola bilmədilər. Çünki bu soydaşlarımız meydanlarda Qarabağ probleminin həll olunmayacağını gözəl başa düşürlər və yaxşı bilirlər ki, işsizlik və Qarabağ problemi, qaçqın və məcburi köçkünlərin sosial vəziyyətinin yaxşılaşdırılması məsələsi ölkə Prezidenti cənab Heydər Əliyevin birinci dərəcəli problem kimi hər gün diqqət mərkəzindədir.
Qaçqın və məcburi köçkünlərdən sosial baza yaratmağa çalışanların yalan və uydurmaları hətta o yerə çatıb ki, 5-10 nəfəri başına yığıb küçələrdə keçirdikləri tədbirlərdə məcburi köçkünlərin adından uydurma da danışırlar. Bu qurumlara xidmət edən bəzi mətbu orqanlar isə öz səhifələrində bu cür böhtanlar dərc etməkdən çəkinməyərək, yanlış ad, soyad və rayonları da göstərirlər. Lakin bu adları və ünvanları dəqiqləşdirərkən məlum olmuşdur ki, həmin rayonlarda belə bir adda məcburi köçkün yoxdur və ya onlardan xəbərsiz bəzilərinin adından istifadə ediblər.
Təəssüflər olsun ki, onlar Xocalı şəhidlərinin ruhunu narahat edərək, fevralın 26-da ehsan vermək adı ilə mitinq keçirməyə göstərməkdən çəkinməyiblər.
Yeddi yüz min nəfər məcburi köçkün adından “Məcburi Köçkünlərin Forumu” adlı qondarma bir tədbir keçirməyə və Azərbaycan hakimiyyətinə müraciət qəbul etməyə onların heç bir mənəvi haqqı yoxdur.
Bütün bunları nəzərə alaraq, Dövlətqaçqınkomun mətbuat xidməti bir daha bəyan edir ki, beş-on nəfər qohum-qonşusunu başına toplayanlar, səviyyəsi və qabiliyyətlərindən yuxarı iddialarda olanlar bilməlidirlər ki, qaçqın və məcburi köçkün soydaşlarımız həmişə olduğu kimi, bu gün də Azərbaycan Respublikasının Prezidenti cənab Heydər Əliyevi, onun apardığı daxili və xarici siyasəti ürəkdən dəstəkləyirlər. Onların köçkünlər adından danışmağa haqqı olmadığı kimi, qaçqın və məcburi köçkünlərin də bu cür siyasi fiqurların “narahatlığına və qayğıkeşliyinə” ehtiyacları yoxdur. Hər şeydən əvvəl ona görə ki, bu soydaşlarımızın problemləri ilə birbaşa dövlət özü məşğul olur.
Məcburi köçkünlərin uzun müddət belə məşəqqətə dözmələri ölkə Prezidenti cənab Heydər Əliyevə olan inamlarından irəli gəlir və onlar əmindirlər ki, möhtərəm Prezident işğal altındakı torpaqlarımızın istənilən yolla azad edilməsinə nail olacaq və bu insanlar doğma yurdlarına qayıdacaqlar.
Bəzi kütləvi informasiya vasitələrində məcburi köçkünlərlə bağlı dərc olunan böhtan xarakterli yazıların isə heç bir əsası yoxdur.
Bölmənin digər xəbərləri
