SİYASƏT
Əbdürrəhman Hamisi: Son onillikdə Azərbaycanın sanballı uğurlarının arxasında yeni formasiya siyasətçisi İlham Əliyev dayanır
Qahirə, 25 iyun (AZƏRTAC). “Son onillikdə Azərbaycanın sanballı uğurlarının arxasında yeni formasiya siyasətçisi İlham Əliyev dayanır”. Misirli məşhur yazıçı, ssenarist və tərcüməçi Əbdürrəhman Hamisi bu fikri AZƏRTAC-ın xüsusi müxbirinə verdiyi eksklüziv müsahibədə söyləmişdir.
Onun sözlərinə görə, bugünkü Azərbaycan - dövlətin səriştəli və uzaqgörənliklə idarə edilməsi, ölkənin sabit gələcəyinin qurulması baxımından bir örnəkdir. Yazıçı demişdir: “Hesab edirəm ki, Azərbaycan Prezidenti İlham Əliyev ölkəni keyfiyyətcə yeni səviyyəyə çatdırmışdır. Son 10 ildə Azərbaycanda siyasət, iqtisadiyyat və mədəniyyət sahələrində möhtəşəm dəyişikliklər baş vermişdir. Şübhəsiz, son illərdə qazanılmış bütün bu uğurlar Prezident İlham Əliyevin adı ilə bağlıdır. O, yeni dövrün, yeni formasiyanın təcrübəli siyasətçisi kimi, qlobal dünya siyasətindən yaxşı baş çıxarır, aktual meyilləri, qlobal çağırışları aydın görür və ölkənin hansı yolla getməli olduğunu düzgün təyin edir. Bu il Azərbaycanda prezident seçkiləri keçiriləcəkdir. Əminəm ki, Azərbaycan xalqının əksəriyyəti İlham Əliyevin namizədliyinə, yəni sabitliyə və firavanlığa səs verəcəkdir. Mən gördüklərimə əsasən belə fikirləşirəm. Azərbaycanın sıçrayış xarakterli dinamik inkişafı hamı üçün aşkar faktdır. Bu, təkcə mənim subyektiv fikrim deyildir, Azərbaycanın uğurlarını obyektiv qiymətləndirən çoxsaylı tədqiqatlar və monitorinqlər də belə düşünməyə əsas verir”.
Bugünkü Azərbaycanı möcüzə adlandıran A.Hamisi vurğulamışdır: “Azərbaycan təkcə zahiri əlamətlərinə görə deyil, mahiyyət etibarilə Avropanın və dünyanın ən yaxşı ölkələrindən birinə çevrilmişdir. Bakı bir möcüzədir, azərbaycanlılar bu möcüzəni çox qısa müddətdə yarada bilmişlər. Bu ecazkar şəhərdə köhnə Bakının memarlığı qorunub saxlanmış və Avropanın bir sıra ölkələri ilə müqayisədə onlardan qat-qat yaxşı olan müasir, təmiz, gözəl şəhər yaradılmışdır. Bu ölkə məni valeh etmişdir. Bugünkü Azərbaycan bir tərəfdən milyardlarla vəsaitin, digər tərəfdən - sakinlərin öz ölkəsinə hədsiz sevginin nəticəsidir”.
Əbdürrəhman Hamisi Azərbaycanın iqtisadi siyasəti mövzusuna toxunaraq qeyd etmişdir ki, Azərbaycan öz məxsusi iqtisadi modelini və maliyyə siyasətini yaratmağa nail olmuşdur. Bu uğurlar onun həm dünya maliyyə böhranından yan keçməsinə, həm də davamlı inkişaf nümayiş etdirməsinə, regionun liderinə çevrilməsinə imkan vermişdir. Azərbaycan regionda sabitlik, təhlükəsizlik və firavanlıq adasını xatırladır. Hamisi demişdir: “Məsələn, mən Bakıda olarkən yaşadığım mehmanxananın xadiməsindən onun aylıq məvacibini soruşdum. Məlum oldu ki, o, ayda 500 manat əməkhaqqı alır! Bu, bir sıra əlamətlərə görə çox yüksək məvacibdir, özü də təkcə xidmət heyəti üçün yox. Bu fakt əyani şəkildə göstərir ki, Azərbaycanda həyat səviyyəsi günbəgün artır, bu ölkədə böhrandan əsər-əlamət yoxdur, əksinə, Azərbaycan yüksəliş yollarındadır!
Əbdürrəhman Hamisinin fikrincə, Azərbaycan dünya xəritəsində nisbətən kiçik ölkə olsa da, beynəlxalq birlikdə böyük nüfuz qazanmışdır. O deyir: “Ölkənin nüfuzu və beynəlxalq reytinqi günbəgün artır. Mənim müşahidələrimə görə, son on ildə hətta bizim Misirdə də insanlar Azərbaycan haqqında, onun siyasəti, mədəniyyəti, iqtisadi uğurları barədə daha çox məlumat əldə etməyə başlamışlar. Qeyd etmək lazımdır ki, Azərbaycan səfirliyi də ölkənizin reallıqlarının populyarlaşması üçün çox iş görür. O, müxtəlif tədbirlər keçirir, Ermənistan-Azərbaycan, Dağlıq Qarabağ münaqişəsi barədə, ölkənizin bütün səviyyələrdə qazandığı uğurlar barədə ictimaiyyətə məlumat verir. Bununla yanaşı, bu gün Azərbaycan çoxsaylı beynəlxalq tədbirlərin - konfransların, idman yarışlarının, musiqi müsabiqələrinin keçirildiyi bir məkana çevrilmişdir. Bakıda unudulmaz “Eurovision” musiqi müsahibəsini xatırlamaq, yaxud dünyada ilk dəfə keçiriləcək Avropa oyunlarını qeyd etmək kifayətdir. Bu, sizin dövlətinizin sabit və inkişaf etmiş bir ölkə kimi nüfuzunu, onun möhkəm mövqeyini göstərən çox əlamətdar faktdır. Bəzən təəccüblənirik ki, Azərbaycanda az qala hər həftə nə isə bir əlamətdar hadisə baş verir. Bakı küçələrindəki təmizlik və səliqə-sahman da məni heyran etdi, çünki bunlar mədəniyyətin ən birinci əlamətlərindəndir. Bir daha təkrar edirəm, Azərbaycan qədim və sivilizasiyalı bir xalqın məskəni olan çox gözəl Avropa ölkəsidir. Azərbaycanın inkişaf sürəti isə sadəcə heyrət doğurur - ölkənin hər yerində genişmiqyaslı tikinti və yenidənqurma işləri aparılır. Belə gözəl ölkə yaratmış Azərbaycan dövlətinin rəhbərliyi və Azərbaycan xalqı ən yüksək tərifə və böyük ehtirama layiqdir.
Yazıçı xüsusi vurğulamışdır ki, ölkəmizin möhtəşəm uğurları əsası Heydər Əliyev tərəfindən qoyulmuş siyasətlə bilavasitə bağlıdır. Heydər Əliyev ölkəni dağılmaq və parçalamaq təhlükəsindən xilas etmiş, “Əsrin müqaviləsi”nin imzalanması təşəbbüsünü irəli sürmüş, Azərbaycan neftinin dünya bazarlarına nəql olunmasının əsasını təmin etmiş, siyasi və iqtisadi islahatlara başlamış, bazar iqtisadiyyatına keçid üçün şərait yaratmışdır. Alim deyir: “Hesab edirəm ki, Sovet İttifaqının dağılması postsovet məkanındakı bütün respublikaları, o cümlədən Azərbaycanı da sunami kimi məhv edə bilərdi. Bu yeni dövlətlərin də Heydər Əliyev kimi liderə, onun kimi nəhəng siyasətçiyə, böyük şəxsiyyətə ehtiyacı vardı. Azərbaycanı sabitlik və təhlükəsizlik məkanına yalnız o çıxara bilərdi və bunu etdi. Məhz onun sayəsində bu ölkə salamat qaldı, Azərbaycan bir dövlət kimi tanındı. Xoşbəxtlikdən, bu gün Prezident İlham Əliyev Heydər Əliyevin siyasi kursunu ikiqat qüvvə ilə davam etdirir.
A.Hamisi vurğulamışdır: “Bununla əlaqədar, Azərbaycanın dünyanın aparıcı ölkələri ilə imzaladığı “Əsrin müqaviləsi”nin əhəmiyyətini xüsusi qeyd etmək istərdim. Bu barədə çox şey bilirəm və hesab edirəm ki, həmin müqavilənin imzalanması Azərbaycan tarixində mühüm dönüş nöqtəsi olmuşdur. Ulu öndər Heydər Əliyevin timsalında Azərbaycan öz uzaqgörən siyasəti sayəsində dövlətçiliyin qorunub saxlanması üçün neft amilindən müdrik şəkildə istifadə etmiş və neft gəlirlərini bu sahənin inkişafına, əhalinin həyat səviyyəsinin artırılmasına yönəltmişdir”.
Misirli ədəbiyyatçı daha sonra bildirmişdir ki, o, Azərbaycan incəsənətinin pərəstişkarı və sərrafıdır. A.Hamisi deyir: “Sizin böyük və qədim xalqınızın çox zəngin yaradıcı potensialı vardır. Minilliklər boyu öz milli incəsənətini yaradan azərbaycanlıların nadir xalçaları, miniatürləri, digər incəsənət şedevrləri və analoqu olmayan muğam sənəti bütün dünyada məşhurdur. Dünyaya Üzeyir Hacıbəyli və musiqi sənətinin digər korifeylərini bəxş etmiş zəngin, bənzərsiz mədəniyyətinizlə çox yaxından tanışam. Virtuoz muğam ifaçısı Alim Qasımov isə müasir dünya incəsənətində əsl möcüzədir”.
Yazıçı Əbdürrəhman Hamisi Ermənistan-Azərbaycan, Dağlıq Qarabağ münaqişəsi ilə əlaqədar Azərbaycanı dəstəklədiyini bildirərək demişdir: “Mən Azərbaycanın haqlı mövqeyini dəstəkləyirəm və ümid edirəm ki, Azərbaycan erməni işğalçılar tərəfindən tutulmuş torpaqlarını dinc yolla geri qaytara biləcəkdir. Azərbaycanlılar çox sivil xalqdır, bu isə onların sülhsevər insanlar olması deməkdir. Təəssüf ki, sizin bədxah qonşularınız Azərbaycan xalqının sülhsevər olmasından sui-istifadə etmişlər. Əfsus ki, uzun müddət Qarabağ münaqişəsi barədə bizim də məlumatımız az olmuşdur. Lakin indi vəziyyət dəyişmişdir. Azərbaycan bu münaqişənin dinc yolla tənzimlənməsi üçün beynəlxalq təşkilatlara fəal əlaqə saxlayır və bu siyasət davam etməlidir. Əminəm ki, Azərbaycan xüsusən Misir kimi ölkələrlə əməkdaşlığı möhkəmlətməli, gənclər, incəsənət xadimləri, ədəbiyyatçılar arasında mədəni mübadilə aparılmalıdır. Sizin ölkənizin bu problemə dair mövqeyini gücləndirmək üçün Azərbaycan reallıqları ilə daha yaxından tanış olmaq lazımdır. Müsəlman ölkəsi olan Misir Azərbaycanın mövqeyini dəstəkləməlidir. Ölkələrimiz arasında mədəni münasibətlər, xalqlarımız arasında dialoq çox vacibdir, çünki bu dialoq bizim münasibətlərimizin bünövrəsi, xalqlarımız arasında möhkəm dostluq körpüləri kimi xidmət edir”.
Əbdürrəhman Hamisi sonda söyləmişdir ki, atası (onun da ad-soyadı Əbdürrəhman Hamisi idi) görkəmli yazıçı və şair olmuşdur. Vaxtilə Prezident Ənvər Sadatla aralarında yaranmış fikir ayrılıqları səbəbindən Sovet İttifaqına köçüb gəlmiş Əbdürrəhman Hamisi (ata) 1978-ci ildə Bakıda olmuşdur. O, tanınmış bir şair kimi Moskva nümayəndə heyətinin tərkibində “ Ədəbiyyatların qardaşlığı - xalqların qardaşlığıdır” adlı tədbirdə iştirak etmiş və həmin tədbirdə Azərbaycan xalqının ümummilli lideri Heydər Əliyevlə tanış olmuşdur. Ə.Hamisi (oğul) deyir: “O vaxt mən tələbə idim, buna görə atamla Bakıya getməmişdim, lakin heç vaxt unutmaram ki, atam bu görkəmli şəxsiyyətə valeh olmuşdu, onun haqqında çox həvəslə danışırdı. Atamın sözlərinə görə, Heydər Əliyevin erudisiyası, incəsənəti dərindən bilməsi, mədəniyyət sahəsində geniş biliklərə malik olması hamını heyran qoymuşdur. O, hərtərəfli və görkəmli şəxsiyyət idi. Atamla Bakıya getmədiyimə görə çox təəssüfləndim. İllər keçdi, mən də Heydər Əliyevlə tanış oldum, lakin təəssüf ki, bu tanışlıq onun şəxsiyyətinin miqyasını kitablar vasitəsilə öyrənmək və həmin kitabları tərcümə etmək yolu ilə gerçəkləşdi. İndi hesab edirəm ki, onu yaxından tanıyıram. Heydər Əliyev böyük liderdir, tarixdə bu cür şəxsiyyətlər 100 ildə, 200 ildə bir dəfə yaranır. Hesab edirəm ki, sizin xalqın bəxti gətirib, çünki Heydər Əliyev kimi lideriniz olub”.
Qeyd edək ki, Əbdürrəhman Hamisi Moskva Dövlət Universitetinin sənətşünaslıq fakültəsinin məzunudur. “Görkəmli adamların həyatı” seriyasından “Heydər Əliyev” kitabını ərəb dilinə tərcümə etmişdir. Ümumiyyətlə, o, 20-yə yaxın kitabı, o cümlədən Azərbaycan xalçaları, miniatür sənəti, muğam haqqında, habelə Qarabağ haqqında “Qara bağın qar bəxti” kitabını rus dilindən ərəb dilinə tərcümə etmişdir. A.Hamisi həm də “Əbədi şəhər” romanının, 30 seriyalı populyar “Günəş quşları” teleserialının, uşaqlar və böyüklər üçün bir sıra başqa çoxseriyalı filmlərin ssenari müəllifidir.
Bir sıra ədəbi mükafat və təltiflərin laureatı olan, çoxillik əmək fəaliyyəti dövründə xalqımızın zəngin mədəni irsini öyrənmiş Əbdürrəhman Hamisi Azərbaycan-Misir münasibətlərinin dərinləşməsinin və möhkəmlənməsinin tərəfdarıdır.
Asya Hacızadə
AZƏRTAC-ın xüsusi müxbiri
Qahirə