Ekspert: Avropa dövlət başçılarının Bakıya səfəri Azərbaycanın Avrasiya siyasi məkanında əhəmiyyətindən xəbər verir
Bakı, 12 may, AZƏRTAC
Bir ay ərzində bir sıra Avropa dövlət başçısının Azərbaycana səfəri, enerji və təhlükəsizlik məsələlərini müzakirə edərək razı qayıtmaları rəsmi Bakının Avrasiya siyasi məkanında əhəmiyyətindən xəbər verir. Bu gün dünyada davam edən geosiyasi mübarizənin ağır nəticələri Avropanı silkələyir.
Bu sözləri Türkiyənin “Haber 365” media qrupunun rəhbəri, siyasi ekspert Yakub Aslan AZƏRTAC-a açıqlaması zamanı deyib.
Onun sözlərinə görə, dünya siyasi məkanında paradoksal hal yaranıb. Belə ki, Avropa Parlamenti (AP) Azərbaycana qarşı qərəzli qətnamə qəbul edərək artıq başa çatmış münaqişənin yenidən qızışdırmağa çalışdığı halda Avropa dövlət başçıları Prezident İlham Əliyev ilə görüşmək üçün növbəyə düzülürlər.
“Bu gün Rusiya-Ukrayna və ABŞ-İran müharibələri Avropada enerji böhranı yaradıb. Hələ bu müharibələrdən əvvəl Azərbaycan hasil etdiyi təbii qazı Avropa bazarlarına çıxarmaq üçün heç bir dəstək almadan Cənub Qaz Dəhlizini reallaşdıraraq “köhnə qitənin” enerji təhlükəsizliyinin təmin olunmasında mühüm rol oynamağa başlamışdı. Artıq Azərbaycan Avropaya ildə təxminən 13 milyard kubmetr qaz ixrac edir və bu həcmin artırılması istiqamətində işlər aparılır. AP-nın qərəzli qərarına gəldikdə isə demək lazımdır ki, bu parlamentdə irrasional siyasi qruplar da təmsil olunur. İslamofob, milliyyətçi və müxtəlif lobbilərin təsirində olan siyasi partiya nümayəndələri sifarişli siyasət yürüdərək regionda sülhün bərqərar olmasına maneə törətməyə çalışırlar. Siyasi hakimiyyət uğrunda mübarizə aparan Avropa dövlətlərindəki siyasi partiya və qruplar məhz bu yolla özlərini “azad dünyanın” təmsilçiləri kimi göstərməyə və siyasi kapital toplayaraq seçkilərə qatılmağı planlaşdırırlar. Ermənistan Qarabağın azad edilməsi ilə barışaraq qlobal qüvvələrin əlində siyasi vasitə olmaqdan imtina etməsinə baxmayaraq, ona himayədarlıq etməyə cəhd edənlər heç də erməni xalqını və dövlətini deyil, özlərinin hakimiyyətini və hakimiyyətə gəldikdən sonra bu regiondan necə faydalanacaqlarını düşünürlər”, - deyə Yakub Aslan vurğulayıb.
Ekspert qeyd edib ki, belə hallarla Türkiyə dövləti də dəfələrlə qarşılaşıb: “Türkiyənin istər demokratiya, istərsə də iqtisadi baxımdan bir çox Aİ dövlətlərindən irəlidə olmasına baxmayaraq 50 ilə yaxındır ki, müxtəlif bəhanələrlə quruma üzv qəbul olunmur. Türkiyədə 100-ə yaxın siyasi partiya, müxtəlif siyasi düşüncə daşıyıcısı olan mətbuatın, dini icmaların azad fəaliyyətinə baxmayaraq onun Avropa ailəsinə daxil olması əngəllərlə qarşılanır. Lakin heç bir demokratik inkişaf yolu keçməyən, heç 10 il müstəqil dövlət kimi dünya siyasi arenasında fəaliyyəti olmayan dövlətlər tez-tələsik Aİ-yə üzv kimi qəbul edilir, onların olmayan demokratiyası nümunə kimi misal çəkilir ki, bu da yalnız istehza doğurur”.
Bölmənin digər xəbərləri
