“ELEKTRON ƏRİZƏ” QƏBULUNUN BAŞA ÇATMASINA 16 GÜN QALMIŞDIR
Tələbə Qəbulu üzrə Dövlət Komissiyasından AZƏRTAC-a bildirmişlər ki, 2008/2009-cu tədris ili üçün ali məktəblərə və orta təhsil bazasından (11 illik) orta ixtisas məktəblərinə keçiriləcək qəbul imtahanlarında iştirak etmək üçün internet vasitəsilə “Elektron ərizə” qəbulunun başa çatmasına 16 gün qalır.
Mayın 16-dək TQDK-nın serverinə 102.663 abituriyentdən “Elektron ərizə” daxil olmuşdur. Onlardan 91.193 nəfəri sənəd qəbulu komissiyalarında “Elektron ərizə”lərini təsdiq etdirmişlər.
Mayın 16-dək qabiliyyət imtahanı komissiyalarında xüsusi qabiliyyət tələb edən ixtisaslar üzrə təhsil almaq istəyən 1134 abituriyent qeydiyyatdan keçmişdir.
I ixtisas qrupu üzrə 32.360, II ixtisas qrupu üzrə 19.470, III ixtisas qrupu üzrə 35.915, IV ixtisas qrupu üzrə 14.852 “Elektron ərizə” təqdim olunmuşdur.
Təqdim olunan “Elektron ərizə”lərin ilkin təhlilləri göstərir ki, qəbul imtahanlarında iştirak etmək istəyən abituriyentlərin 49.567 nəfəri kişi, 53.031 nəfəri qadındır. Sənəd verənlərdən 64.279 nəfəri cari ilin məzunudur.
Bölmənin digər xəbərləri
