SİYASƏT
Əmir Nizar Əbu Əli: Üçüncü Bakı Beynəlxalq Humanitar Forumu ölkənin müsbət imicini möhkəmlətməyə yönəlmiş nüfuzlu tədbirdir
![Əmir Nizar Əbu Əli: Üçüncü Bakı Beynəlxalq Humanitar Forumu ölkənin müsbət imicini möhkəmlətməyə yönəlmiş nüfuzlu tədbirdir](/files/2013/3/1200x630/14071451552459657518_1200x630.jpg)
Əmman, 25 noyabr (AZƏRTAC). İordaniyanın Filadelfiya Universitetinin professoru Əmir Nizar Əbu Əli oktyabrın 31-də və noyabrın 1-də Azərbaycanda keçirilmiş Üçüncü Bakı Beynəlxalq Humanitar Forumu barədə səmimi təəssüratlarını AZƏRTAC-ın müxbiri ilə bölüşmüşdür.
O demişdir: Azərbaycan Beynəlxalq Humanitar Forumun keçirilməsi üçün ən layiqli, belə bir geniş əhatəli və nüfuzlu tədbiri ən yüksək səviyyədə təşkil etməyə qabil olan ölkədir. Sevindirici haldır ki, əvvəlki illərdə olduğu kimi bu dəfə də forumda dünyanın aparıcı ölkələrindən 700-dən çox nümayəndə, o cümlədən sabiq prezidentlər, Nobel mükafatı laureatları, tanınmış ictimai-siyasi xadimlər, alimlər iştirak edirdi. Forum dünyanın intellektual və elmi elitasının birləşməsi baxımından böyük əhəmiyyət kəsb edir. Bu nüfuzlu tədbir eyni zamanda Azərbaycan reallıqlarını bütün dünyada təbliğ etmək üçün gözəl imkan yaradır və ölkənin müsbət imicini möhkəmlətməyə yönəlmişdir”.
Əmir Nizar Əbu Əli daha sonra qeyd etmişdir ki, Azərbaycan Prezidenti İlham Əliyev forumun açılışında söylədiyi dərin məzmunlu, dolğun nitqində bəşəriyyət qarşısında duran bir sıra qlobal məsələləri əhatə etmiş, humanitar məsələlərin uğurlu həlli sahəsində Azərbaycanın təcrübəsi barədə söhbət açmış, bütün bəşəriyyət üçün maraq doğuran bir sıra ideyalar irəli sürmüşdür.
İordaniyanın Filadelfiya Universitetinin professoru demişdir: “Azərbaycan dövlətinin başçısı beynəlxalq məsələlərə, humanitar əməkdaşlığa çox böyük diqqət yetirir, ümumi tərəqqi və inkişaf üçün qlobal elmi ideyaların təbliğini dəstəkləyir”.
Əmir Nizar Əbu Əli vurğulamışdır: “Əlamətdar haldır ki, Prezident İlham Əliyev Azərbaycanın sosial-iqtisadi nailiyyətləri barədə də danışdı. Bu uğurların real təsirini hiss etmək üçün yaxşılığa doğru sürətlə dəyişən Bakıya nəzər salmaq kifayətdir. Mən sovet dövründə Azərbaycan Politexnik İnstitutunda təhsil almışam, orada namizədlik dissertasiyası müdafiə etmişəm. Son illərdə ölkədə baş vermiş böyük dəyişiklikləri müqayisə edə bilərəm. Bu gün Bakı inkişaf etmiş iqtisadiyyata malik, həyat səviyyəsinin yüksək olduğu müasir, firavan şəhərdir. Bakını haqlı olaraq yaşayış üçün münasib şəhərlərdən biri hesab edirlər. Yaxşı məlumdur ki, Azərbaycan müstəqillik əldə edəndən sonra Azərbaycan xalqının ümummilli lideri, ölkədə sabit və möhkəm dövlət quruculuğunun təməlini qoymuş Heydər Əliyev onun uğurlu inkişafında böyük rol oynamışdır. Bu gün Prezident İlham Əliyev Heydər Əliyevin siyasi kursunu ləyaqətlə davam etdirir və ölkənin bütün istiqamətlərdə uğurlarını çoxaldır. Buna görə də Azərbaycan xalqı ona növbəti dəfə yüksək etimad göstərmiş, yenidən ölkədə ali dövləti vəzifəyə seçmişdir. Əminəm ki, xalq öz liderini sevir, ona etibar edir, onun siyasətini dəstəkləyir. Bununla bərabər, Azərbaycan xalqı dünya miqyaslı böyük siyasi xadim Heydər Əliyevin xatirəsini ehtiramla yad edir. O, xalqın yaddaşında əbədi qalacaqdır, çünki bu xalq nə istəyirdisə ona vermişdir - sabitlik, təhlükəsizlik, əmin-amanlıq, firavanlıq”.
Müsahibim onu da qeyd etmişdir ki, Azərbaycan xalqının yenidən yüksək etimad göstərdiyi müdrik və uzaqgörən rəhbər bundan sonra da Azərbaycanın inkişafı və tərəqqisi naminə fəaliyyətini uğurla davam etdirəcəkdir.
İordaniyanın Filadelfiya Universitetinin professoru onu da vurğulamışdır ki, forumun çoxsaylı iştirakçıları qlobal miqyaslı məsələlərə dair maraqlı və geniş müzakirələr aparmışlar. İordaniya nümayəndəsi demişdir: “Forum çərçivəsində keçirilən” dəyirmi masa”lar səmərəli diskussiyalarla yadda qaldı. Forum məkanında zəmanəmizin elə görkəmli simaları ilə tanış olmaq imkanı vardı ki, bu insanları heç bir başqa yerdə birlikdə görmək mümkün deyil. Şəxsən mən çox maraqlı insanlarla, öz həmkarlarımla elmi mövzularda söhbət etdim, biz faydalı əlaqələr yaratdıq, müasir texnologiyaların gələcək inkişafı məsələlərinə dair həmfikirlər tapdıq”.
Forumun yekun hissəsində iştirakçılar ölkənin regionları ilə daha yaxından tanış ola bildilər. Azərbaycanın regionları da inkişaf və tərəqqi nümunəsi sayıla bilər. O demişdir: “Biz Azərbaycanın qədim Qəbələ diyarında olduq. Qəbələ çox gözəl, təmiz və abad şəhərdir, sakinlər üzügülər və mehribandır. Biz tarixi abidələrə tamaşa etdik, unikal arxeoloji qazıntılarla tanış olduq, pianino istehsal edilən müəssisədə, ərəb dili tədris olunan məktəbdə, bir sıra başqa maraqlı və görməli yerlərdə olduq. Bütün bunlar forumun qonaqlarına çox güclü təsir bağışladı.
İordaniyanın Filadelfiya Universitetinin professoru Əmir Nizar Əbu Əli daha sonra demişdir: “Son olaraq bir daha qeyd etmək istərdim ki, Üçüncü Bakı Beynəlxalq Humanitar Forumu müxtəlif ölkələrdən olan alimlərin fikir mübadiləsi aparması baxımından çox əhəmiyyətli oldu. Bu cür tədbirlər sayəsində əcnəbi qonaqlar Azərbaycan haqqında geniş təsəvvür əldə edir, onu dünya mədəniyyət və elm mərkəzi kimi tanıyırlar. Əminəm ki, forum bundan sonra da hər il ən yüksək səviyyədə keçiriləcək, bütün dünyanın intellektual elitalarının diqqətini özünə cəlb edəcəkdir”.
Asya Hacızadə
AZƏRTAC-ın xüsusi müxbiri
Əmman