ERMƏNİSTAN AŞPA-NIN 1609 SAYLI QƏTNAMƏSİNƏ TAM ƏMƏL ETMƏMİŞDİR
AZƏRTAC-ın xüsusi müxbiri xəbər verir ki, Avropa Şurası Parlament Assambleyasının yaz sessiyasında bu il fevral ayının 19-da Ermənistanda keçirilmiş prezident seçkilərindən sonra martın 1 və 2-də Yerevanda nümayiş iştirakçılarına divan tutulması ilə bağlı növbədənkənar müzakirələr aparılmış və bununla əlaqədar 1609 saylı qətnamə qəbul edilmişdir. Qətnamədə Ermənistan rəhbərliyindən baş vermiş hadisələrin əsl səbəbkarlarının tapılıb cəzalandırılması, normal fəaliyyət üçün ölkədə şərait yaradılması, siyasi əqidələrinə görə insanların izlənməsinə və həbsxanalara salınması kimi əməllərə son qoyulması tələb edilmiş və onlara yay sessiyasına kimi vaxt verilmişdir.
Qətnamədən irəli gələn müddəaların yerinə yetirilməsi vəziyyətini araşdırmaq və bu barədə məruzə hazırlamaq məqsədilə AŞPA tərəfindən Jorj Kolombye və Con Preskottdan ibarət xüsusi nümayəndə heyəti iyunun 16-17-də Yerevanda ikigünlük rəsmi səfərdə olmuş, ölkə prezidenti və digər rəsmilərlə, ictimaiyyətin nümayəndələri, müxtəlif partiyaların rəhbərləri ilə görüşmüşdür. Qətnamədə göstərilmiş iradların aradan qaldırılması sahəsindəki işlər həmməruzəçiləri tam razı salmamışdır.
AŞPA Monitorinq Komitəsinin sədri Sergey Qolovatıy qurumun sədrinə iyunun 20-də ünvanladığı məktubda Ermənistana səfərdən sonra həmməruzəçilərin hazırladıqları məruzədəki iradları diqqətə çatdırmış və Ermənistandakı demokratik təsisatların fəaliyyəti ilə bağlı məsələnin yay sessiyasında yenidən müzakirəyə çıxarılmasının vacibliyini bildirmişdir.
Bölmənin digər xəbərləri
