Formula 1 yarışlarını işıqlandıran media nümayəndələri üçün ixtisaslaşmış kurs təşkil olunacaq
Bakı, 16 noyabr, AZƏRTAC
“Bakı Şəhər Halqası” Əməliyyat Şirkəti (BŞH) Bakıda baş tutmuş Formula 1 Azərbaycan Qran-Prisi yarışlarının akkreditasiyalı media nümayəndələri üçün idman üzrə ingilis dili kursları təşkil edəcək.
BŞH-dən AZƏRTAC-a bildiriblər ki, kursun keçirilməsində əsas məqsəd azərbaycanlı media işçilərinin ingilis dili bacarıqlarına yiyələnmələri ilə yanaşı, mövcud bacarıqların daha da inkişafını təmin etməkdir.
BŞH-nin marketinq və kommunikasiya şöbəsinin rəhbəri Nigar Arpadarai ingilis dili kursunun Azərbaycanda fəaliyyət göstərən kütləvi informasiya vasitələrinin (KİV) nümayəndələri üçün yeni imkanlara yol açacağını bildirib: “Bu təlim daim inkişaf edən idman aləmi, xüsusən də Formula 1 haqqında yeniliklər əldə etmək, bu yeniliklər əsasında xəbər hazırlamaq, həmçinin ölkəmizdə keçirilən beynəlxalq idman yarışlarının fəal iştirakçısına çevrilmək baxımından yerli media işçilərimiz üçün yeni imkanlar yaradacaq”.
İngilis dili kursuna yalnız indiyədək Bakıda baş tutmuş Formula 1 yarışlarından hər hansı birində akkreditasiyalı şəkildə iştirak etmiş müxbir və fotoqraflar qatıla bilərlər.
Dil kursları bu il noyabrın sonunda başlayacaq və 2020-ci il martın sonunadək davam edəcək.
Bölmənin digər xəbərləri
