Qərbi Afrikada iqlim fəlakəti: 32 milyon insan evini tərk edə bilər
Bakı, 15 avqust, AZƏRTAC
Qərbi Afrika Dövlətlərinin İqtisadi Birliyi (ECOWAS) regionda iqlim böhranının fəsadları ilə bağlı ciddi xəbərdarlıq edib.
AZƏRTAC xəbər verir ki, qurumun bəyanatına görə, ekoloji problemlər səbəbindən bölgədə təxminən 32 milyon insan daxili köçkün vəziyyətinə düşə bilər. Regionun iqlim hədəflərinə çatması üçün isə 294 milyard dollar investisiyaya ehtiyac var. Nigeriyanın paytaxtı Abujada keçirilən seminarda çıxış edən ECOWAS-ın iqtisadi işlər və kənd təsərrüfatı üzrə komissarı Kalilu Silla regional karbon bazarı platformasının yaradılmasının vacibliyini vurğulayıb. O qeyd edib ki, Qərbi Afrika qlobal iqlim dəyişikliyinə qarşı dünyanın ən həssas və müdafiəsiz bölgələrindən biridir. Onun sözlərinə görə, 2050-ci ilə qədər regionda temperaturun 1,5-3 dərəcə artacağı gözlənilir. Bu artım milyonlarla insanın həyat şəraitini pisləşdirərək kütləvi miqrasiyaya yol açacaq. Mövcud maliyyə çatışmazlığının üzv dövlətlərin iqlim hədəflərini böyütməsi ilə daha da dərinləşdiyini bildirən komissar problemin həlli üçün regional miqyasda birgə və təxirəsalınmaz tədbirlərin görülməsini zəruri hesab edir. Komissar, həmçinin vurğulayıb ki, Qərbi Afrika zəngin təbii resurslarına rəğmən karbon bazarlarındakı potensialından hələ də yetərincə istifadə edə bilmir. Regionda 350 milyon hektardan çox əkin sahəsi, geniş meşəliklər, manqrov ekosistemləri və torpaqların bərpası üçün böyük imkanlar mövcuddur. Bu aktivlər yüksək keyfiyyətli karbon kreditlərinin yaradılmasına imkan versə də, tənzimləyici boşluqlar, texniki potensialın zəifliyi, monitorinq sistemlərindəki çatışmazlıqlar və sertifikatlaşdırma problemləri bölgə ölkələrinin beynəlxalq karbon bazarlarında lazımi səviyyədə təmsil olunmasına mane olur. Kalilu Silla seminar iştirakçılarını layihə çərçivəsini hərtərəfli nəzərdən keçirməyə, investorlar üçün etibarlı, şəffaf və cəlbedici bir platformanın qurulmasına dəstək verməyə çağırıb.
Bölmənin digər xəbərləri
