Ermənistanın siyasi rəhbərliyi revanşist çağırışlara qarşı aydın mövqe nümayiş etdirməlidir - ŞƏRH
Bakı, 21 sentyabr, AZƏRTAC
Azərbaycanda akkreditə olunmuş diplomatik korpus nümayəndələrinin Qarabağ və Şərqi Zəngəzura səfəri ilə bağlı Ermənistanın bəzi siyasi, ictimai və media dairələrində edilən etirazlar, xüsusilə səfərdə iştirak edən diplomatlara qarşı səsləndirilən ittihamlar hələ də səngimək bilmir. Qarabağ və Şərqi Zəngəzur Azərbaycanın beynəlxalq səviyyədə tanınmış suveren əraziləridir. Azərbaycan öz dövlət sərhədləri daxilində hansı tədbiri keçirəcəyini, hansı beynəlxalq nümayəndə heyətini qəbul edəcəyini, xarici diplomatları ölkənin hansı bölgəsinə dəvət edəcəyini başqa bir dövlətlə razılaşdırmaq məcburiyyətində deyil.
Bunu AZƏRTAC-a açıqlamasında Beynəlxalq Avrasiya Mətbuat Fondunun prezidenti Umud Mirzəyev söyləyib.
O bildirib ki, Azərbaycan öz ərazisində bərpa-quruculuq işləri aparır, dağıdılmış şəhər və kəndlərini yenidən qurur, tarixi-mədəni irsini bərpa edir, keçmiş məcburi köçkünlərin doğma yurdlarına qayıdışını təmin edir. Bütün bunlar ölkəmizin suveren hüquqlarının həyata keçirilməsidir. Diplomatik korpusun bu proseslərlə yerində tanış olması isə beynəlxalq münasibətlər baxımından tamamilə təbii bir hadisədir. Ermənistanın müəyyən siyasi dairələri hansı hüquqi əsasla başqa bir dövlətin suveren ərazisində təşkil olunan diplomatik səfərlərə müdaxilə etmək iddiası ilə çıxış edirlər? Bu sualların cavabı əslində aydındır. Azərbaycanın ərazi bütövlüyü və suverenliyi müzakirə mövzusu deyil.
O qeyd edib ki, Qarabağ və Şərqi Zəngəzur Azərbaycan xalqının tarixi yaddaşının, milli mədəniyyətinin və mənəvi irsinin ayrılmaz hissəsidir. Bu ərazilərdə Qafqaz Albaniyası dövrünə aid abidələr, İslam mədəniyyətinin nümunələri, Azərbaycan xalqının çoxəsrlik yaşayışını və mədəni həyatını əks etdirən maddi-mədəni irs mövcuddur. Həmin irsin öyrənilməsi, qorunması və bərpası Azərbaycan dövlətinin vəzifəsidir.
“Otuz ilə yaxın davam etmiş işğalın nəticələrini yalnız siyasi bəyanatlarda deyil, dağıdılmış şəhər və kəndlərimizdə, viran qoyulmuş qəbiristanlıqlarımızda, məhv edilmiş tarixi-mədəni abidələrimizdə, doğma yurdlarından didərgin düşmüş insanların taleyində görmüşük. Bu gün də həmin ərazilərdə basdırılmış minalar insanların həyatına təhlükə yaradır, keçmiş məcburi köçkünlərin təhlükəsiz qayıdışını çətinləşdirir. Biz hər gün müharibənin və işğalın ağır humanitar nəticələrinin aradan qaldırılması üçün çalışırıq”, - deyə U.Mirzəyev bildirib.
Onun sözlərinə görə, belə bir şəraitdə beynəlxalq diplomatların həmin ərazilərə səfər etməsi, dağıntıların miqyasını, mina təhlükəsini, bərpa-quruculuq prosesini öz gözləri ilə görməsi son dərəcə əhəmiyyətlidir. Xarici diplomatlar yalnız rəsmi məlumatlarla kifayətlənməməli, yerlərdəki vəziyyətlə birbaşa tanış olmaq imkanına malik olmalıdırlar. Qarabağa təşkil olunan səfərlərin mühüm əhəmiyyəti də məhz bundadır.
“Ermənistanın müəyyən siyasi və ictimai dairələrinin bu səfərlərə qarşı çıxması, iştirakçı diplomatları hədəfə alması və onların fəaliyyətini ittiham predmetinə çevirməsi sülh və qarşılıqlı etimad mühitinin formalaşmasına xidmət etmir. Ermənistan hakimiyyəti Azərbaycanın ərazi bütövlüyünü tanıdığını və sülhə sadiq olduğunu bəyan edir. Lakin ölkənin siyasi və ictimai mühitində Qarabağla bağlı ərazi iddialarını yaşadan, Azərbaycanın suveren hüquqlarının həyata keçirilməsinə etiraz edən yanaşmaların mövcudluğu ciddi narahatlıq doğurur. Burada mühüm bir məsələ var: sülh yalnız rəsmi bəyanatlarla məhdudlaşmamalıdır. Sülhə sadiqlik qonşu dövlətin suverenliyinə hörmətdə, ictimai ritorikada, siyasi davranışlarda və gələcək nəsillərə ötürülən münasibətdə də özünü göstərməlidir. Ermənistanın siyasi rəhbərliyinin üzərinə düşən mühüm vəzifələrdən biri də ölkə daxilində ərazi iddialarını və revanşist çağırışları təşviq edən yanaşmalara qarşı aydın mövqe nümayiş etdirməkdir”, - deyə U.Mirzəyev vurğulayıb.
Bölmənin digər xəbərləri
