Energetika Nazirliyində İctimai Şuranın növbəti iclası baş tutub
Bakı, 21 sentyabr, AZƏRTAC
Energetika Nazirliyində İctimai Şuranın sədri və üzvlərinin, eləcə də nazirliyin nümayəndələrinin iştirakı ilə Şuranın hibrid formatda növbəti iclası keçirilib.
Nazirlikdən AZƏRTAC-a bildirilib ki, iclasda şuranın fəaliyyətinin təşkili, qarşıda duran vəzifələr və növbəti dövr üzrə həyata keçirilməsi nəzərdə tutulan tədbirlər müzakirə olunub.
Enerji təminatı, bərpaolunan enerji mənbələrinin inkişafı, enerji səmərəliliyi, ictimai iştirakçılığın genişləndirilməsi və vətəndaşların enerji sahəsində məlumatlılığının artırılması kimi məsələlər nəzərdən keçirilib. Bununla yanaşı, “Qaz qurğularının istismarı Qaydaları” layihəsi ilə bağlı fikir mübadiləsi aparılıb.
İclas zamanı Şuranın 2026–2027-ci illər üzrə Fəaliyyət Planı müzakirə edilib. Plan çərçivəsində enerji sektorunun müxtəlif istiqamətləri üzrə dövlət qurumları, təhsil və elmi müəssisələr, enerji şirkətləri və digər maraqlı tərəflərlə görüş və müzakirələrin keçirilməsi, ictimai rəyin öyrənilməsi, eləcə də maarifləndirici tədbirlərin təşkili nəzərdə tutulur.
Gələcək fəaliyyət çərçivəsində akademik və elmi mühitin iştirakının genişləndirilməsi, müzakirə olunan məsələlərin xüsusiyyətindən asılı olaraq aidiyyəti mütəxəssislərin Şuranın iclaslarına dəvət olunması planlaşdırılır.
İctimai Şura enerji sektorunda ictimai iştirakçılığın genişləndirilməsi, aktual məsələlərin ictimai müzakirəyə çıxarılması, enerji sahəsində məlumatlılığın artırılması və vətəndaş cəmiyyəti institutları ilə əməkdaşlığın inkişaf etdirilməsi istiqamətində fəaliyyətini davam etdirəcək.
Bölmənin digər xəbərləri
