Toğrul Əsədullayev: Yeni layihələrimizdə muğam sənətinin təbliğinə xüsusi yer verilir
Bakı, 21 sentyabr, AZƏRTAC
Azərbaycan muğam sənətinin yaşadılması və gələcək nəsillərə çatdırılması istiqamətində həyata keçirilən layihələr milli musiqimizin təbliğində mühüm rol oynayır. Muğam konsertləri və muğam axşamları bu sənətin geniş auditoriyaya təqdim olunmasına, gənc ifaçıların yaradıcılıq imkanlarının nümayişinə və muğam ənənələrinin davam etdirilməsinə xidmət edir. Qarşıdakı dövrdə də bu istiqamətdə yeni layihələrin və konsert proqramların həyata keçirilməsi planlaşdırılır.
Bunu AZƏRTAC-a açıqlamasında Əməkdar artist, sənətşünaslıq üzrə fəlsəfə doktoru, Azərbaycan Dövlət Mədəniyyət və İncəsənət Universitetinin dosenti, Prezident mükafatçısı Toğrul Əsədullayev deyib.
“Yeni tədris ili ilə yanaşı, yeni konsert mövsümümüz də başlayıb. Bu il sıralarımıza yeni tələbələr qoşulub. İnanıram ki, onlar öz istedad və bacarıqları ilə qarşıdakı dövrdə uğurlu nəticələr əldə edəcəklər. Qarşıda bizi bir sıra maraqlı konsert proqramları və yeni layihələr gözləyir. Bu layihələr sırasında muğam konsertləri və muğam axşamları xüsusi yer tutur. Artıq həmin tədbirlər üzrə hazırlıqlara başlanılıb. İnanıram ki, bu layihələr həm muğam sənətinin təbliğinə, həm də gənc ifaçıların öz yaradıcılıq imkanlarını nümayiş etdirməsinə töhfə verəcək”, - deyə Əməkdar artist qeyd edib.
Bu yaxınlarda Pekində səfərdə olan və “Ay işığında İpək Yolu: Azərbaycan və Çin musiqi harmoniyasında” adlı konsert proqramında ifaçı kimi çıxış edən Toğrul Əsədullayev Azərbaycan musiqisini, xüsusilə muğam sənətini geniş auditoriyaya təqdim etməkdən məmnunluğunu ifadə edib. O bildirib ki, tədbir Qeyri-Hökumət Təşkilatlarına Dövlət Dəstəyi Agentliyinin və Azərbaycanın Çindəki səfirliyinin dəstəyi, Xan Şuşinski Fondunun təşkilatçılığı ilə keçirilib.
“Qarşıda bizi yeni səfərlər, tədbirlər və konsert proqramları gözləyir. Hazırda həmin layihələrə hazırlıq gedir. Eyni zamanda, səsyazma studiyalarında yeni mahnılar üzərində işləyir, dinləyicilərə yeni ifalar təqdim etməyə hazırlaşırıq. Ümid edirəm ki, yeni yaradıcılıq mövsümü də uğurlu olacaq”, – deyə Toğrul Əsədullayev qeyd edib.
Müxbir – Gülay Nəzərova
Bölmənin digər xəbərləri
