Baş məşqçi: Dünya Kuboku inkişaf baxımından üzgüçülərimiz üçün mühüm imkanlar yaradacaq
Bakı, 21 sentyabr, AZƏRTAC
Azərbaycan üzgüçüləri Dünya Kubokuna uzun müddətdir hazırlaşırlar. Avqust ayında keçirilmiş “Ganja Cup” turniri yaxşı sınaq oldu. Dünya Kubokunun üzgüçülərimiz üçün yüksəksəviyyəli yarış olduğunu etiraf etməliyik. Bu turnir dünyanın ən güclü üzgüçülərini yaxından izləmək, onların təcrübəsindən yararlanmaq və onlarla mübarizə apararaq ustalıq fərqini azaltmaq baxımından mühüm imkan yaradacaq.
Bu sözləri AZƏRTAC-a açıqlamasında üzgüçülük üzrə Azərbaycan milli komandasının baş məşqçisi Luka Qabrilo deyib.
İsveçrəli mütəxəssis bildirib ki, yarış üçün komandanın heyətinə 16 üzgüçünün cəlb olunması nəzərdə tutulub: “Yaşları 14-24 arasında dəyişən idmançıların əksəriyyəti karyerasının ilkin mərhələsində olan gənc üzgüçülərdir. Bu cəhətdən yarış onlar üçün beynəlxalq arenada təcrübə toplamaq və gələcək inkişaf istiqamətlərini müəyyənləşdirmək mənasında olduqca əhəmiyyətlidir.
Dünya Kubokunda iştirakın əsas məqsədlərindən biri dünyanın aparıcı üzgüçülərini canlı izləmək, onların çıxışlarından motivasiya almaq və öz göstəricilərini inkişaf etdirməkdir. İdmançılar üçün beynəlxalq səviyyəli üzgüçülərlə eyni yarış mühitində olmaq, eləcə də axşam proqramında üzmək imkanı əldə etmək də mühüm təcrübə olacaq. Komandanın Dünya Kubokunun digər mərhələlərində iştirak etməsi hazırda planlaşdırılmır”.
Qeyd edək ki, yarış oktyabrın 1-3-də Su İdmanı Sarayında keçiriləcək. Bakı mərhələsində dünyanın güclü üzgüçüləri müxtəlif məsafələrdə mübarizə aparacaqlar.
Müxbir – Cavid Əliyev
Bölmənin digər xəbərləri
