Fransa ictimaiyyəti Azərbaycanın sivilizasiyalararası dialoqa töhfələri barədə məlumatlandırılıb
Paris, 27 fevral, AZƏRTAC
Fransanın www.lopinion.fr saytında Azərbaycanın UNESCO yanında daimi nümayəndəliyinin rəhbəri səfir Anar Kərimovun müsahibəsi yayılıb.
Müsahibədə Xocalı soyqırımının 25-ci ildönümünün qeyd olunduğu bir vaxtda Dağlıq Qarabağda qoşunların təmas xəttində yenidən toqquşma baş verməsinə toxunan jurnalist regiondakı gərginliyə baxmayaraq, Azərbaycanın fundamentalizm virusuna yoluxmaması ilə maraqlanıb.
Anar Kərimov suala cavabında bunu anlamaq üçün ölkəmizin tarixinə və coğrafiyasına nəzər salmağın vacibliyini bildirib. O, Azərbaycanın bir çox təsirlərin kəsişməsində və müxtəlif mədəniyyətlərin keçdiyi İpək yolunun üzərində yerləşdiyini söyləyib. Səfir ilk dünyəvi müsəlman respublikası olan Azərbaycanda müsəlman dünyasında ilk operanın, universitetin, azad mətbuatın yarandığını, qadınlara ilk dəfə səsvermə hüququnun verildiyini diqqətə çatdırıb. Bildirib ki, 1991-ci ildə ölkəmiz müstəqilliyini bərpa edəndə vəziyyət heç də asan deyildi. Ermənistanın Azərbaycanın Dağlıq Qarabağ bölgəsini və onun ətrafındakı 7 rayonunu işğal etməsi müstəqilliyin sevincini yaşamağımıza imkan vermədi. Ancaq ölkəmiz təbii ehtiyatları sayəsində iqtisadi dirçəlişə nail oldu. Azərbaycandakı siyasi iradə ölkəmizdəki multikulturalizm ənənələrini qoruyub saxlamağa kömək etdi. Məhz multikultural irsimiz bizi fundamentalizmdən və Orta Şərqdə baş alıb gedən digər təhdidlərdən qorudu.
Səfir qeyd edib ki, multikultural irsin qorunub saxlanmasında dövlətin rolu əvəzedilməzdir. Bunsuz mənfi təsirlər baş alıb gedə bilər. Əgər vaxtında zəruri addımlar atılmasa, tolerantlıq əks istiqamətə yönələr. Dövlətin bu istiqamətdə siyasəti son dərəcə diqqətlə müəyyən edilməli və tarazlaşdırılmalıdır. Siyasət dini və etnik icmaları qarşı-qarşıya qoymamalıdır. Dövlət strategiyasının əsas elementləri hər bir vətəndaşın hüquqlarının konstitusiya təminatına əsaslanır. Sonra qanunvericilik bu hüquqların tətbiqi üçün təsisatların yaranmasını təmin edir.
Diplomat 2014-cü ildə Bakıda Beynəlxalq Multikulturalizm Mərkəzinin açıldığını və onun əsas məqsədinin etnik və dinlərarası dialoqu təşviq etmək olduğunu vurğulayıb. O, Mərkəzin formal görüşlər məkanı deyil, vətəndaşların, müəllimlərin, uşaqların tolerantlıq ruhunda formalaşdığı məkan olduğunu bildirib. Ölkəmizdə dini liderlərin dinamizmi və öhdəlikləri digər vacib məqamdır. Bütün dini bayramlarda onlar bir araya gəlirlər. Belə mesajların təsir gücü daha çox olur. Ölkədə nifrət dolu çıxışlara qarşı cəza tədbirləri də ciddidir. Belə məqamlara qarşı bizdə tolerantlıq yoxdur. Ölkəmiz məhz buna görə fundamental virusa yoluxmayıb.
Mədəniyyətlərarası dialoqu təşviq etmək məqsədilə Azərbaycan Prezidenti İlham Əliyevin 2008-ci ildə “Bakı prosesi”ni irəli sürdüyü, ilk görüşün Avropa Şurası və müsəlman ölkələrinin mədəniyyət nazirləri səviyyəsində həyata keçirildiyi diqqətə çatdırılıb. Hazırda bu prosesin iki ildən bir keçirilən forum statusu qazandığı və təkcə Avropa və müsəlman ölkələrini deyil, eləcə də Cənubi Amerika, Afrika və Asiya ölkələrini də əhatə etdiyi, UNESCO və digər beynəlxalq təşkilatların da forumun iştirakçıları arasında olduğu və IV Ümumdünya Mədəniyyətlərarası Dialoq Forumunun mayın 5-6 -da keçiriləcəyi diqqətə çatdırılıb.
Daimi nümayəndə bildirib ki, antisemitizm və islamofobiyanın baş alıb getdiyi dünyada mədəniyyətlərarası dialoq çox vacibdir, Azərbaycanın bütün sivilizasiyalar arasında vasitəçi və müxtəlif mədəniyyətlərin birgə mehriban yaşamasının müdafiəçisi olmaq istəyir. Daxili və xarici dialoq olmadan, hətta ən yaxşı inkişaf etmiş iqtisadiyyat, güclü silah və yüksək texnoloji avadanlıq olsa belə, cəmiyyətin çiçəklənməsi mümkün deyil. Siyasi iradə və cəmiyyətin öhdəliyi arasında kombinasiya çox vacibdir.
A.Kərimov 2004-cü ildə Azərbaycanın birinci xanımı Mehriban Əliyevanın UNESCO-nun xoşməramlı səfiri seçiləndən sonra əlaqələrimizin sıx inkişaf etdiyini bildirib. 2013-cü ildə UNESCO maliyyə böhranı yaşayanda Azərbaycan könüllü şəkildə təşkilata təhsil və mədəni irsin qorunub saxlanması məqsədilə öz töhfəsini verib. “Mədəni irs mövzusu bizim üçün prioritet məsələdir. Ermənistan işğal etdiyi torpaqlarımızda tarixi və mədəni abidələrimizi məhv edib. BMT Təhlükəsizlik Şurası 1993-cü ildə qəbul etdiyi 4 qətnamə ilə erməni silahlı qüvvələrinin işğal edilmiş ərazilərdən dərhal və qeyd-şərtsiz çıxmasını tələb edir. Münaqişənin ən faciəvi səhifəsi 1992-ci il fevralın 26-da 613 dinc sakinin qətlə yetirildiyi Xocalı qırğınıdır. Bu faciəni heç vaxt unuda bilmərik. Amma biz Bakıda erməni kilsəsini restavrasiya etməklə göstərdik ki, mədəni irsin qorunub saxlanmasında ermənilərlə eyni mövqeni tutmuruq. Ölkəmiz daim sülh şəraitində birgəyaşayışa üstünlük verir. Azərbaycan yenə də intiqam hissindən uzaqdır və regionda sülhün bərqərar olmasında maraqlı olduğunu bəyan edir”, - deyə A. Kərimov qeyd edib.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
